Mga gov’t employees apil ba sab sa Endo?

Daghan ang nangalipay apan daghan sab ang naglibog niining pagpirma ni Presidente Rodrigo Duterte sa executive order nga nagpahunong na niining giingong illegal contractualization o gitawag og Endo. Pipila sa atong mga kaigsuonan, ilabi na kadtong mga nanarbaho sa hataas nang katuigan apan wa gihapon i-regular sa kompaniya nga ilang gialagaran, ang gibati na karon og kahingawa sa gihimo sa presidente kay lagi mahatagan na man og kasiguroan ang ilang panrabaho.

Gipanghimatngunan sa presidente ang mga abusadong employer nga undangon na kining pagpangontrata og empleyado ug gimandoan ang Department of Labor sa paghatag og mga listahan sa mga kompaniya nga mopadayon gihapon ning maong sistemaha.

Pero daghan usab ang naglibog niini tungod kay sa dili pa man diay kini hingpit nga mapatuman, nagkinahanglan pa kini nga moagi sa Kongreso aron maoy mo-amend sa Labor Code.

Ang Article 106 ngadto sa 109 sa Labor Code sa nasod, gitugotan man sab diay kining contracting ug subcontracting sa mga ahensiya.

So, kon mao ni, unsa may unod o epekto niadtong gipirmahan ni Duterte nga magdepende ra man diay gihapon ang tanan sa Kongreso?

Kining mga ahensiyaha maoy sagad dili mo-regular sa ilang ipangkuha nga mga tawo kay lagi ang nature sa ilang negusyo dili man sab permamente. Hangtod nga dili pa gyud mausab ang balaod, kining sistemaha magpadayon gihapon.

Pero yuna ra. Kon hingpit na kining mapatuman, apil na ba niini ang atong mga job order ug casual employees sa gobiyerno nga bisan og nagserbisyo nag pipila ka tuig wa gihapon ma-regular?

Kini maoy angay tan-awon sa administrasyon. Lisod kaayo manilhig ta sa uban unya naa ra diay silhigonon sa atong tugkaran.