Beautiful liar

Kinsa man say di makalitan? Nagkuyog pa mi si Monsour kaganina sa pagpanuroy sa SRP unya karon tua na siya sa ospital?

“Unsa may nahitabo niya, Nang?” Nagkurog ang akong tingog.

Gikulbaan gyud ko pag-ayo. “Hapit siya kuyapi dihang natumba lag kalit.”

Unya nahinumdom ko sa among paglingkod ni Monsour sa seawall sa SRP. Kalit lang siyang natumba sa iya nang pagtindog.

“Duna ba siyay sakit, Nang?” “Kon makaari ka ugma sa ospital, sultihan tika sa tanan.”

Misaad ko nga moadto sa ospital pagka ugma kay gabii na man. Gisultihan ko sa Mama ni Monsour kon unsang ospitala ang nahimutangan sa akong boyfriend. Hapit ko magbuntag nga way tarong nga kinatulgan. Unsaon, si Monsour ra man ang kong gihunahuna. Nagtuo gyud ko nga duna siyay sakit nga gililong nako.

Di tingali siya gusto nga mahasol ko.

Human ko mohigop og gatas, miadto ko sa ospital diin gi-confined si Monsour dihang nakapananghid na ko kanila ni Mama ug Papa. Samtang nagsakay kog taksi, kusog ang pagbutuk-butok sa akong dughan. Maoy diha sa akong hunahuna ang sitwasyon ni Monsour. Unsa kaha ang iyang sakit?

Natulog si Monsour sa akong pag-abot sa ospital. Ang iyang Mama maoy nagbantay niya. Miamen ko sa inahan sa akong boyfriend. Suod na siya sa akong dughan kaniadto pa nga silingan kami. Mao bitaw nga nahimo kong childhood friend si Monsour.

Sa tan-aw ko kang Monsour, morag misamot siya kadaot ug pagpangluspad. Sa among panagkita kaniadto ug sa dihang gisugot ko siya, nakamatikod na ko nga daot ug lusparon si Monsour apan wa ko lang kini hatagig pagtagad kay duna man gyuy tawo nga ingon ani. Apan karon, nahunahuna nako nga ang iyang pagkadaot ug pagkaluspad tungod diay sa iyang sakit.

“Bag-o pa siyang nakapahuway, Ivon. Nakatulog siya sa pagpinaabot nimo.”

Kahilakon ang Mama ni Monsour. Ug ako sab, morag gustong mohilak. Naluoy kong nagtan-aw kang Monsour.

“Milamay na pag-ayo ang iyang sakit sa iyang lawas, Ivon.”

“Unsa man diay sakit ni Monsour, Nang?”

“Kanser sa dugo. Leukemia, Day Ivon.”

Hapit di ko makaginhawa sa akong nadungog. Morag gipatay ko niadtong tungora. Wa na gyud ko makapugong sa akong kaugalingon, nakahilak na gyud ko.

(SUMPAYAN)