MOBALIK SA PBA?

Wala una mosanong si Renaldo Balkman sa posibilidad nga mobalik na siya’g duwa sa Philippinw Basketball Association (PBA) human niya natuboy ang San Miguel-Alab Pilipinas sa kampiyunato sa bag-uhay lang nahuman nga Asean Basketball League (ABL).

Ang Puerto Rican nga magduduwa, kansang lifetime ban sa PBA nalibkas na sa miaging buwan, nagkanayon nga magsaulog una siya sa ilang pagkahimong kampiyon sa ABL una siya maghunahuna kon

unsa’y iyang sunod nga himuong lakang.

“Right now, we are going to see the next week or so and see what happens and then go

from there,” matod ni Balkman sa interbyu sa Spin.ph.

Si Balkman, 33, napahamtangan og lifetime ban sa PBA niadtong 2013 gumikan sa iyang pagtuok sa iyang kauban sa Petron Blaze nga si Arwind Santos. Sa dihang gilibkas ni PBA

commissioner Willie Marcial ang ban ngadto kang Balkman sa sayong bahin ning tuiga, kadaghanan sa teams sa PBA ang tatawng adunay interes nga mokuha kaniya isip import.

Apan giklaro ni Marcial nga ning puntoha, pabiling ang San Miguel Beermen mao gihapon ang adunay katungod sa serbisyo ni Balkman bisan pa og gi-ban pa kini.

Ang Beermen aduna na’y gikuhang import alang sa Commissioner’s Cup apan bisan pa niini, dili pa gihapon puwedeng makuha sa laing team si Balkman.

Mahimo lang makuha sa ubang teams si Balkman kon buhian kini sa San Miguel.