WARRIORS GIBAWSAN; GITUHAK SA PELICANS
Jazz gipakuratsa sa Rockets sa Game 3
Mga duwa karon:
5:00 am. - Boston @ Philadelphia (Celtics 2, Sixers 0)
8:30 am. - Toronto @ Cleveland (Raptors 0, Cavaliers 2)
Saktong dominasyon maoy gibawos sa New Orleans Pelicans sa dihang ilang gilubong og taga tuhod ang
defending champion Golden State Warriors, 119-100, sa Game 3 sa ilang Western Conference best-of-five semis kagahapon sa National Basketball Association (NBA).
Sa kadaugan, natipakan sa Pelicans ang bintaha sa Warriors sa series, 2-1.
Mangtas nga nakaduwa si Anthony Davis sa panag-engkuwentro nga nakapamatuod sa ilang kapabilidad nga aduna silay igong katakos nga posibling makahatag og dakong hudlat sa defending
champion Warriors pinaagi sa pagpuga og 33 puntos, 18 ka
rebounds ug upat ka steals.
Si Jrue Holiday mipaksit usab og 21 ug 18 ang natampo ni Ian Clark batok sa iyang kanhi team nga Warriors.
Nangulo sa pilderong Golden State si Klay Thompson nga may 26, Kevin Durant 22 ug 19 usab ang nahimo ni Stephen Curry.
Sa gihapon, ang Pelicans mao gihapob ang mo host sa Game 4 ugmang adlawa.
Sukwahi sa kasagaran nilang mga duwa, ang Golden State wa mangigo sa ilang mga
outside shooting ug sa 31 nila ka itsa sa three-point area, 22 niini ang nasipyat ug 38 porsiyento lang sa percentage sa ilang shooting sa kinatibuk-an. Samtang sa laing Western
semis, human masugamak sa makauuwaw nga kapildihan, misulbong og balik ang Houston Rockets ug mikulit kini og 113-92 nga kadaugan batok sa Utah Jazz sa Game 3 aron iposte ang 2-1 nga bintaha sa best-of-7 series.
Si James Harden miyagyag og 25 puntos ug 12 ka assists aron pangulohan ang Houston, Chris Paul miabag og 15, pito ka reobunds ug unom ka
assists alang sa Rockets. Ang Game 4 ipahigayon ugmang adlawa ug sa gihapon adto sa korte sa Utah.
Samtang karong buntag, mo-bawos sa pag host ang Philadelphia Sixers sa Boston Celtics sa alas 5 ang takna.
Ang Sixers, sa niaging duha nila ka duwa, wa pa makabawos sa Boston sa ilang series. Bisan pa man og maoy perming maglabaw sa ilang duwa, apan lupigon kini sa lahutay sa hinapos nga mga bahin.
Ang Cleveland Cavaliers, sa ilang bahin, mosulod sa korte nga taas ang ilang moral, sa Game 3 sa ilang series nga sugdan sa alas 8:30 karong buntag batok sa Toronto Raptors nga adto ipahigayon sa Quicken Loans Arena sa Cleveland.
Kini tungod kay ilang giharos ang Raptors sa unang duha nila ka duwa didto mismo sa korte sa Toronto alang sa 2-0 nga bintaha.