MI-DIVE BISAN OG HUNAS, TIPI

CZECH NATIONAL NAUGBOK SA PANAGSAMA BEACH SA MOALBOAL

Patay human nasiak ang ulo sa usa ka langyaw dihang ni-dive sa dagat nga dakong hunas sa Chili Bar, Panagsama Beach, Barangay Basdiot, lungsod sa Moalboal, niadtong Sabado sa alas 10:00 sa gabii.

Si Roman Sgiloda, 27, ulitawo, usa ka Czech national nga turista, nag-abang og lawak sa West Cabana Resort, Basdiot, Moalboal.

Si Sr. Insp. Ramil Morpos, hepe sa Moalboal Police, nga nahinabi sa Superbalita, nagkanayon nga ang biktima nga si Sgiloda, dead-on-arrival sa ospital sa lungsod, diin nakaangkog grabing kadaot sa iyang ulo.

Matod ni Morpos, hubog ang biktima, nga Sabado pa sa buntag nag-inom uban sa mga higala niini.

Si Sgiloda, giingong nananghid sa iyang mga higala nga moadto sa pansayan kay motubag sa sugo sa lawas.

Apan nakugang sila kay sa pagkagawas niini kalit nga nidagan ug nipatong sa terrace dayon og dive sa dagat.

Apan wala kini makahibalo nga hunas na pagkagabii hinungdan nga ang ulo niini nipilit sa mga panas nga bato ug maayong pagkawalis sa bagulbagol.

Ang mga kauban nga nakasaksi, nagdali sa pagtabang sa biktima ug gidala sa tambalanan apan DOA tungod sa grabing kadaot sa ulo.

“Walay foul play, aksidente gyud nga nahitabo. Daghan nakasaksi wala sila magdahom sa kalit niini nga pagdagan ngadto sa terrace dayon dive sa dagat,” dugang ni Morpos.

Matod ni Morpos nga ang terrace sa resort nag-umbaw sa dagat nga may gitas-on nga 15 metros unya daghang dagkong bato nga panas sa ubos.

Nagtuo si Morpos nga gustong magpahuwas ang biktima pinaagi sa pagligo sa dagat kay nahubog na kini tungod kay buntag pang nag-inom apan, wa makabantay nga hunas na.

Nasuta sab nila buntag naligo ang biktima nagsige kini og dive sa samang dapit kay taob man ug posibling nakalimot kini nga hunas na sa gabii. /