OPAV mopresentar og solusyon ngadto sa DOTr

Mopresentar og “soft solutions” ang Office of the Presidential Assistant for the Visayas (OPAV) ngadto sa Department of Transportation aron masolusyonan ang suliran sa kahuot sa dapat sa trapiko sa Metro Cebu.

Apil sa gitan-aw nga solusyon sa OPAV ang pagtukod og Metro Cebu Traffic Council, pag-isyu og temporary operator’s permit (TOP) sa traffic enforcers pinaagi sa mayor, paghimo og unloading ug loading bay sa mga public utility jeepney sa mga establisemento daplin sa dan, pag-synchronize sa traffic lights system, pagpahugot sa traffic enforcement ug pag-seminar sa mga drayber sa insaktong mga lagda sa trapiko.

“So, hopefully kaning mga soft solutions makatabang ni, mao baya ni giingon sad sa mga tawo, para pagdisiplina sa mga jeepney,” sumala ni OPAV Assistant Secretary Anthony Gerard “Jonji” Gonzales, kinsa mopresentar sa mga solusyon ngadto kang Secretary Arthur Tugade.

Siya nitumbok sa mga hinungdan sa nasinati nga trapik sa Metro Cebu sama sa kakuwang sa integration, koordinasyon sa mga local government unit, disiplina sa mga drayber ug pagdumala sa problema sa jeepney.

Niadtong Sabado, subay sa kamandoan ni Secretary Michael Dino, nakigtagbo siya sa mga opisyal sa mga siyudad sa Lapu-Lapu, Mandaue, ug Talisay uban Land Transportation Office ug mga representante sa Mega Cebu Development and Coordinating Board. Wa maapil ang siyudad sa Sugbo.

Ilang gituki ang mga solusyon nga gikinahanglan sa Sugbo sa pagsulbad sa trapiko.

Matod ni Gonzales, base sa ilang nakita sa report sa Japan International Cooperation Agency ( Jica), nga kon madumala ang problema sa jeepney, moluagluag og 30 porsyento ang dan.

Kon manindot ang pagdisiplina sa mga drayber ug hugot nga traffic enforcement, mokunhod og 18 porsyento ang kahuot sa trapiko sa Metro Cebu.

Usa sa ilang nakita sa enforcement nga dili na mosugot ang LTO 7 nga moisyu og TOP ang mga traffic enforcer nga dili regular nga mga empleyado sa gobiyerno.

Si Gonzales nipasabot nga kon TOP ang isyu mahadlok ang mga drayber kay makiha sila kondili moadto sa LTO 7 sud sa tulo ka adlaw.

Siya namahayag usa sa ilang nakita nga solusyon nga ang mayor maoy isyuhan og TOP sa LTO 7 ug ang maong opisyal na ang mohatag ngadto sa lainlaing traffic enforcers.

Si Gonzales nagkanayon nga paningkamotan usab sa OPAV nga ma-integrate and database sa LTO ug mga LGU aron mahibaw-an kinsa ang nangadakpan ug makit-an dayon sa ahensiya.

Sumala niini kinahanglan usab i-synchronize ang traffic lights sa Metro Cebu kay kon matrapik ang usa ka lugar, motakod kini sa laing dapit.

Nakita hinuon nila nga dali ra ma-synchronize ang traffic lights system sa mga siyudad sa LapuLapu, Mandaue ug Talisay kay susama ra og model.

Siya nidugang nga hangyuon nila ang DOTr pinaagi sa Regional Development Council (RDC) nga magtukod og MCTC nga maoy mangu sa traffic management sa LGUs.

Giduso usab nila ang Cebu Expressway project ug bypass roads nga masudlan og kwarta sa General Appropriations Act aron mapatuman na.