DSWD 7 mipakusog sa ilang information caravan sa tibuok Central Visayas
Gipakusgan sa Department of Social Welfare and Development (DSWD) Field Office VII ang ilang information drive pinaagi sa pag-adto sa mga labing layo nga komunidad sa rehiyon.
Ang information caravan gidesinyo aron paghatag og ideya sa kalambuan sa mga programa ug serbisyo sa DSWD.
Naghatag usab kinig kahigayonan sa publiko kon unsaon nila sa pagkatilaw sa mga programa ug serbisyo sa DSWD sama sa Assistance to Individuals in Crisis Situation (AICS), Pantawid Pamilyang Pilipino Program, Kalahi-CIDSS, Sustainable Livelihood Program, Social Pension for Indigent Senior Citizens, Supplementary Feeding Program, Adoption and Foster Care, Disaster Response ug uban pa.
Ang publiko makapangutana usab ug makatino sa mga isyu atol sa caravan.
Ang DSWD mipahigayon sa ilang unang caravan atol sa “Biyaya ng Pagbabago” sa lalawigan sa Sugbo nga gilusad niadtong Abril 21, 2018 sa ebu Technological University (CTU) Main Campus sa dakbayan sa Sugbo.
Mosobra sa 500 ka partisipante ang mibisita sa DSWD booth.
Ang kalihokan giorganisar sa Kilusang Pagbabago uban sa Office of the Cabinet Secretary (OCS).
Ang ikaduhang kalihokan gihimo sa bukirang barangay sa Alicia, Candijay, Guindulman, Duero ug Sierra Bullones sa lalawigan sa Bohol alang sa indigenous community nga Eskaya.
Kining information caravan nakig-alayon sa Philippine Health Insurance Corporation (PhilHealth) nga nagtinguha nga ang ma-update Eskaya tribe sa ilang member data record (MDR) ug unsaon nila pag-avail ang PhilHealth insurance coverage.
“Pinaagi niining information caravan, natubag na ang akong mga pangutana kabahin sa mga programa ug serbisyo sa DSWD ug sa PhilHealth (Through this information caravan, my questions were answered regarding on the programs and services of DSWD and PhilHealth),” matod ni Maricel Busano, usa ka 36 anyos nga inahan sa Brgy. Tambongan, Candijay.
Ang ikatulong information caravan gihimo sa Brgy. Zaragoza, usa ka island nga barangay sa lungsod sa Badian, habagatanga bahin sa lalawigan sa Sugbo.
Nagkadaiyang impormasyon, mga materyales sa education and communication (IEC) sama sa brochures sa DSWD promotive and protective services, Pantawid Pamilya rice subsidy flyer ug Unconditional Cash Transfer (UCT) flyer ang gipanghatag sa mga partispante.
Sa Abril 28, 2018, ang DSWD moapil na usab sa paglusad sa “Biyaya ng Pagbabago” sa lalawigan sa Bohol nga adto ipahigayon sa lungsod sa Talibon, amihanang lungsod sa Bohol.
Ang DSWD modala usab sa sunod nga information caravan sa lungsod sa Dalaguete, habagatang bahin sa lalawigan sa Sugbo.