MAGPABILIN SA NICU ANG QUADRUPLETS
Nisaka na ang timbang ug clinically stable sa pagkakaron ang quadruplets nga naa sa neonatal intensive care unit sa Vicente Sotto Memorial Medical Center (VSMMC).
Si Dr. Beatriz Isabel Navarro, attending physician sa quadruplets, niingon nga magpabilin sa NICU sud sa tulo ka semana hangtod sa upat ka semana ang upat ka magsuon gumikan kay kuwang sila og buwan dihang gipakatawo sa ilang inahan nga si Irene Rodriguez.
Ang quadruplets nahimugso 31 ka semana niadtong Abril 28 ug sa katapusan sa Hunyo pa unta gikatakda nga manganak si Rodriguez.
Matod ni Navarro nga nadungagan ang timbang sa quadruplets nga naa karon sa ikasiyam nga adlaw sukad sila natawo ug sa pagkakaron way impeksyon.
“So for now, we’re waiting for the criteria for discharge like the weight, they are able to have good suck, they are able to tolerate feeding, with no infection, no difficult in breathing,” sumala ni Navarro ngadto kang Office of the Presidential Assistant for the Visayas (OPAV) Assistant Secretary Anthony Gerard “Jonji” Gonzales. Kinahanglan nga ma “fully develop” ang ilang organs kay
premature sila dihang gipakatawo sa ilang inahan pinaagi sa Cesarean section sa VSMMC.
Si Gonzales personal nga nitunol sa P10,000 nga cash
assistance gikan ni Presidente Rodrigo Duterte ug Special Assistant to the President (SAP) Secretary Christopher Lawrence “Bong” Go ngadto sa mga ginikanan sa quadruplets nga sila si Rodriguez ug Kenneth Tongol.
Kinatibuk-ang, P25,500 ang mga donasyon nga nadawat sa mga ginikanan sa quadruplets, apil ang P10,000 gikan ni Go ug ang laing P10,000 gikan sa Serbisyo on the Go, grupo sa mga tigpaluyo ni Go.
Si Tongol nibutyag nga apil sa nihatag si Architect Ariel Araw-Araw og P5,000 nga taga Barangay Poblacion Pardo, siyudad sa Sugbo.
Sumala ni Gonzales nitugon si Go nga patabangan ang
quadruplets sa mga panginahanglan nga ipaagi sa Malasakit Center.
Samtang, moapil og hatag
sa ilang ayuda ang Cebu City Government ngadto sa pamilya sa quadruplets nga gihimugso sulod sa Vicente Sotto Memorial Medical Center niadtong Abril 28.
Si Mayor Tomas Osmeña nipahibawo pinaagi sa iyang Facebook page nga motabang usab ang dakbayan sa Sugbo.
“CHAMP has been informed.
Cebu City will assist," nagkanayon ang post ni Osmeña.
Si Amor Villanueva, pangulo sa City Hospitalization and Medicine Program (CHAMP) dali usab nakig-alayon ngadto sa pamilyang Tongol.
Gipadayag ni Villanueva nga andam sagubangon sa City Government ang hospital
bills ug laboratory sa upat ka magsuon.
Dugang niya nga kon makahukom silang mobalhin og
private hospitals ilabi na sa Chong Hua ug Sacred Heart, andam gihapon mobayad ang City Hall. / SCG, PAC