Pulis nakabsan sa kinabuhi human mibangga ang motorsiklo sa Ceres bus

Patay ang usa ka pulis human mabangga ang gimaneho niining motorsiklo sa usa ka Ceres bus sa Barangay Langtad, lungsod sa Argao, habagatang Sugbo alas 6:45 niadtong Sabado sa gabii.

Si PO1 Jordan Jim Gevera, 28, ulitawo, ug taga Barangay Sumaguan, sa samang lungsod, ang gideklarar nga dead-on-arrival sa doktor sa Isidro Kintanar Memorial Hospital sa Barangay Bogo, tungod sa kadaot nga naangkon niini sa aksidente.

Si PO2 Roy Repolidon, desk officer sa Argao Police Station, nibutyag nga padung na mopauli si Gevera sa ilang balay gikan ni-duty sa Consolacion Police Station, dihang nahitabo ang disgrasya.

Matod niya, nga si Gevera nga nagpaingon sa habagatan, giingong ni-overtake sa traysikol hinungdan nga naigo kini sa Ceres bus nga gimaneho ni Jimmy Laurel Perez nga iyang gikasugat ug nagpadung sa siyudad sa Sugbo.

Sumala ni Jonathan Tumulak, security manager sa Cebu South Bus Terminal, nga ang truck nga nag-una sa Ceres bus ug unang gikasugat sa pulis, ang nakalihay sa daplin.

Apan, ang Ceres bus nga nagdala sa plaka nga 026CCE ug body number 896 nga nagsunod sa truck, ang wa makabantay sa motorsiklo hinungdan sa panagbangga.

Si Perez, 47, taga Barangay Guinacot, dakbayan sa Danao, ang gitanggong sa Argao Police Station samtang giandam ang kaso batok niya kon mohukom ang tagtungod ni Gevera nga ikiha kini.

Si Tumulak nidugang nga nihatag na og pagtagad ang tagdumala sa Vallacar Transit sa hitabo.