Pulis gitumbok nga protektor sa drugas

Gipaubos na sa imbestigasyon sa Cebu City Police Office (CCPO) ang usa ka pulis nga giingong maoy gisaligan sa usa ka drug pusher sa Barangay Bulacao kinsa nagbitbit sa iyang armalite rifle atol sa lalis batok sa iyang mga silingan.

Sa usa ka video nga gi-post sa Cebu Citizen Report (CSR), makita si Diego (tinuod pangan gipugngan) nga nagdala sa iyang armas og niingon “Wa mo kahibawo ngano nanumbag ko... I-video kay wala natay ilhanay ninyo.”

Ang maong mga pulong maoy usa sa mga klaro nga madungog atol sa lantugi batok sa mga babaye nga iyang silingan diin ang nag-video nahimutang lang pipila ka metro diin nagbarog ug naglakawlakaw si Diego apan wa magpaklaro.

Sa video nga nag-viral sa internet, iyang ginganlan og “big time drug lord” si Diego kinsa nagpuyo sa Sityo Ufeba sa Bulacao ug iyang gipasanginlan ang usa ka PO3 nga nadestino sa Police Station 7 nga maoy protector ni Diego.

“Tan-awa kining usa ka video, ebidensya sa iyang pagkasalbahis. Matod pa niya walay pulis nga modakop niya,” tipik sa post sa CSR.

Si P/SSupt. Joel Doria, city director sa CCPO, nagkanayon nga anaa na sa holding center sa Police Regional Office 7 ang pulis aron siya makatubag sa ilusad nga imbestigasyon batok kaniya.

Si Konsehal Dave Tumulak, chairman sa public order and safety sa konseho, nagkanayon nga ang video nakuha niadtong buwan sa Pebrero ug gi-upload niadtong buwan sa Marso ning tuiga.