Social media sa barangay

Epektibo kaha ang pakulo sa social media sa kampanya sa eleksiyon sa barangay karong Mayo 14? Tungod sa pag-uso sa social media, ang presensiya sa daghang kandidato misibaw sa nagkalainlaing social media sites ning campaign period sa barangay ug Sangguniang Kabataan (SK) labi na sa paborito sa kadaghanan nga Facebook. Makatabang kaha kini sa usa ka kandidato o grupo?

Kon atong susihon pag-ayo, ang gilangkoban sa social media sa kapulawpulawan walay kinutuban ug utlanan sa iyang kalapad sa maabtan. Apan, ang eleksiyon sa barangay nakatutok lang sa gamay nga dapit ug nakatumbok sa komunidad tawo nga gikinahanglan nimo nga botante. Gawas pa, dunay kapin sa 45 mil ka mga barangay sa tibuok nasod nga posible magdungan og gamit sa social media.

Susama sa advertisers sa tradisyonal nga media kaniadto nga namalhin tungod sa barato o walay bayad nga pagbutang sa ilang advertisements sa internet apan, hinayhinay namalik sa karaang media human nakita nga dili kaayo kini epektibo tungod sa kadaghan sa ads dili na kaayo mabasahan ug ang pagtumaw usab sa fake news nga naapekto imong post hinungdan sa pagbalik sa pipila ngadto sa naandan nga pamaagi sa mantalaan, radyo ug telebisyon.

Segurado nga gamiton ang social media sa negatibo nga pamaagi pinaagi sa kasayon sa pag-bash sa ilang kontra sa pulitika. Apan ang Anti Cyber Crime Group (ACGA) 7 mipasidaan sa bashers sa eleksiyon mahimong mapasakaan og kasong libelo.

“If someone will compain to us..., we will evaluate if it falls under libel and we will ile a case,” matod ni Chief Insp. Leo Dofiles, hepe sa ACG 7.

Masayran nato kini human sa eleksiyon sa barangay kon dako ba og matabang ang social media, sama sa makabungog sa kadaugan ni Presidente Rodrigo Duterte sa 2017 election.