Nagnuod ang panagna
Nalingaw ang mga bata nga nagtubig-tubig atbang sa nataran sa balay ni Inse Paterna. Hayag ang buwan. si Junart, ang labing sipat nilang managhigala nagpakahilom lang. Si Thadeo nagbantay kang Ula kon kini molabang sa gadlasan.
“Brad Thadeo, wala lagi silang Ula ug mga kauban natong bata. Di ba basta hayag ang buwan anhi ta magtapok aron maglingaw-lingaw?” matod ni Junart nga naglingkod sa dakong bato.
“Hoy, mga bata! Hain mang ang mga kauban ninyo nga nagmingaw man?” pangutana ni Inse Paterna. Mapinanggaon siya sa mga bata.
Usa ka udto niana, nagirag-irag si Inse Paterna sa iyang silyang tuwang-tuwang ilawom sa dakong punoan sa mangga sa natad sa iyang balay. Gitawag niya ang mga bata.
“Pssssst! Mga bata, umari kamo. Duol mo kanako ug manglingkod. Tagnaon ko ang inyong kapalaran,” matod ni Inse Paterna.
“Sige, Inse! Gusto nakong mahibaw-an kon unsa ko inigdako nako,” ni Junart nga nagngisi.
“Ikaw, Junart, di ka madato. Igo-igo ra gyud nga ikaw ug ang imong pamilya mabuhi sa imong kinitaan,” ni Inse Paterna
nga mihapuhap sa ulo ni Junart.
“Ako pod, Inse. Unsay akong palad?” ni Thadeo.
“Ikaw, Thadeo, maarangarang ang imong kahimtang, apan ikaaway mo ang usa ka suod nga higala,” tubag ni Inse Paterna.
“Ako, Inse, unsay imong panagna?” ni Ula nga mibukhad sa iyang palad..
“A, maayo ang badlis sa imong palad, Ula. Madato ka,” ni Inse Paterna nga mihapuhap sa palad ni Ula.
Dali rang nanglabay ang katuigan. Nagnuod gayud ang mga panagna ni Inse Paterna sa mga bata. Si Junart nahimong drayber sa traysikol ug si Thadeo nahimong Kapitan sa ilang barangay. Sa iyang bahin, si Ula nahimong negusyante og mga alahas. Way nakasunod sa abilidad ni Inse Paterna nga batangan ug tambalan, kay ang iyang mga anak namalibad.
NAGSINGABOT na ang panahon sa eleksiyon alang sa barangay ug sa sangguniang kabataan. Nakigkita si Thadeo kang Junart nga suod niyang higala.
“Brad, karong eleksiyon kuhaon ko ikawng konsehal sa akong linya. Okey ka?” ni Thadeo.
“Okey, Brad, aron makaalagad sab ko sa kaayuhan sa atong barangay,” ni Junart.
Human sa eskutinyo sa mga balota midaog si Junart pagka konsehal sa ilang barangay. Sa unang termino ni Junart maayo ang dagan sa ilang relasyon ni Kapitan Thadeo nga midaog sa ikaduha niyang termino. Apan kalit miaslom ang ilang panaghigala dihang adunay mga proyekto nga si Thadeo ray nabulahan. Tungod niini gitugkan og kasina si Junart. Sa misunod nga ‘barangay election’ milansar si Thadeo alang sa iyang ikatulong termino. Giatbangan siya ni Junart. Nagbinunalay og mga dautang mga pulong ang duruha. Dinautay dinhi; dinautatay didto.
“Mga kaigsuonan ko, ako magpasubli kay aduna pa koy angayng tiwason nga proyekto. Kining karsada nga napahak-pahak, ato kining tarungon,” matod ni Kapitan Thadeo.
Pagka sunod adlaw gibirahan ni Junart si Thadeo.
“Kapitan Thadeo, unsa, imong tarungon kining karsada nga nangapahak? Ayaw patuoha ang mga tawo, uy! Nahigmata na sila sa dugay nilang pagka hinanok. Wa ka man gani kapaayo anang imong pahak!” bomba ni Junart. Namakpak ang iyang dumadapig.
Human sa iniphanay sa mga balota nga gihimo sa Comelec midaog si Junart. Nangalipay ang mga lumolupyo sa ilang barangay kay nagtuo man sila nga ubos sa pag-alagad ni Junart matuman na ang gipangandoy nilang pagbag-o ug paglambo sa ilang barangay. Nagnuod baya ang panagna ni Inse Paterna niadtong mga bata sila si Junart ug si Thadeo.
(KATAPUSAN)