Beautiful liar
Wa ko makatingog nga mitan-aw pagayo kang Noel nga nagtindog sa gawas sa pultahan sa among sala. Ako ang nag-abli sa pultahan dihang dunay nanuktok kay diha man ko sa sala. Kawala gyud nako magdahom nga si Noel ang nia ron sa akong atubangn.
Kalit nga misurok ang akong dugo sa kalagot. Nakahilak ko.
“Please, Noel, ayaw ko bugali-bugali karon. Nakahibawo ka na tingali sa nahitabo kang Monsour.”
Gipugngan ko ang akong kaugalingon nga di motaas ang akong tingog.
“I’m sorry sa nahitabo ni Monsour, Ivon. To be honest kagahapon lang ko nakahibawo. Si Rodel ang nagsulti nako. Maong nia ko aron ipaabot nako nimo ang akong pahasubo. Condolence, Ivon. From now on, di na tika bugal-bugalan. Husto ka, di ka liar. Nagsunod ka lang sa pinitik sa imong kasingkasing ug pagtuman sa inyong gikasabotan ni Rodel.”
Sa unang higayon, nakita ko si Noel nga seryuso kaayo. Wa ko na makita niya ang mabugal-bugalon nga tinan-awan. Gitunol niya nako ang tuo niyang kamot. Nagkurog ang akong kamot nga midawat ani. “S-Salamat.”
Mao ra kini ang akong gikasulti. Gipasulod ko si Noel apan
mibalibad siya. Gisundan ko siya sa akong panan-aw dihang mibiya na siya sa among balay. Nakapanghupaw ko. Unta, di na ko tawgon ni Noel nga liar.
Sa misunod nga gabii, nagtan-aw ko sa gisunod kong variety show sa TV dihang dunay nanuktok sa pultahan sa among sala. Mao pay pagkahuman nakog kaon. Miuna lang kog panihapon kay wa pa man sila si Papa ug Mama. Nanan-aw silag sine. Dominggo niadtong higayona. Ang among katabang nagkaon pa sa kumedor maong ako ang miabli sa pultahan.
“Good evening, Ivon.”
Si Noel ang nahiabot. Gitunol niya nako ang dala niyang red fresh roses. Nakapanglingo ko.
“Pabuwak-buwak ka pa, ha. Unsa man ni, pamawi sa imong kamabugal-bugalon nako?”
“Kaniado ra to, Ivon. Usa ni sa akong gianhi ron, mangayo ko nimog pasaylo.” Nakapanghupaw ko. “Kalimti na to, uy, Noel. Su’od nuon. Adto ta sa sala mag-estorya.”
Mapahiyumon kaayo si Noel nga nakig-estorya nako. Ug ako sab, kalit lang migaan ang pagbati ko niya. Nawala na sa hingpit ang kasuko ko niya.
Niadtong gabhiona, dugay kong nakatulog. Si Noel ang akong gihunahuna.
(KATAPUSAN)