Casino Active nagpa-tryout alang sa MPBL 2nd season

Human nasayran sa Casino Active nga sila na lang ang nahabilin sa tulo ka mga kompanya sa Sugbo nga ningpadayag og interes nga mosalmot sa 2nd season sa Maharlika Pilipinas Basketball League (MPBL), ang management nakadesisyon nga mopahigayon og tryout sa tinguhang makadugang og haligi nga makapalig-on sa ilang kampanya.

Ipahigayon ang unang tryout sa Casino Active sugod karong alas 12:00 sa udto sa Capitol Parish gym sa dalan Escario, dakbayan sa Sugbo. Ang team magdala sa pangalan nga Casino Active Cebu City Niños.

Nagkanayon si Casino Active team consultant Titing Manalili nga dihang nasayran nila nga wala modayon pagsumiter sa ilang aplikasyon ang M.Lhuillier ug Cebu Landmaster sa deadline niadtong Marso 4, hayan nakadesisyon nga mangita pa og laing mga magduduwa nga sa ilang tan-aw makatabang og dako sa ilang kampanya.

“Actually naka-form na man gyud unta mi og team pero pagkahibalo namo nga wala modayon ang M.Lhuillier ug Cebu Landmaster, ni-decide mi nga magpa-tryout pa kay available na man ang players sa M.Lhuillier ug Landmaster,” matod ni Manalili sa pagpakighinabi ning mantalaan.

“At least karon, mas daghan ang among choices of players. As much as possible, we want to form an all-Cebuano team.”

Gipasabot ni MPBL operation head Zaldy Realubit nga adunay mga gipangayo ang M.Lhuillier ug Cebu Landmaster nga dili nila mahatag ning puntoha sa torneyo.

“Daghan ang gipangayo sa M.Lhuillier ug Landmaster nga dili pa namo ma-com- ply for the next conference. Nag-expect gyud unta mi og two or three teams from Cebu pero ang Casino Active ra man ang nakaabot sa deadline,” pasabot ni Realubit, kinsa kanhi magduduwa sa Philippine Basketball Association (PBA).

Hinuon gipasabot ni Realubit nga posible pa nga makaapil ra gihapon ang M.Lhuillier ug Cebu Landmaster sa ugma damlag.

“Pero as now, it’s definite nga dili sila makaapil for the conference,” batbat ni Realubit, kinsa produkto sa University of San Jose Recoletos (USJ-R) Jaguars.

Ang MPBL 2nd season mosugod karong Hunyo 12 sa Araneta Coliseum sa Manila.

Nagkanayon si Realubit nga gikan sa 10, ang miyembrong teams sa bag-ong regional basketball tournament sa nasod miabot na og 26 ka teams.

Gawas sa Casino Active, ang ubang bag-ong teams gikan sa Visayas ug Mindanao nagagikan sa Davao City, Davao Occidental, Zamboanga City, General Santos City, ug Basilan Island. / ESL