JAMES MITIPI SA RAPTORS
Cavs, Celtics 3-0 na sa Eastern semis
Mga duwa karon
3:00 am- Golden State @ New Orleans 8:00 am- Houston @ Utah Nakapasulod og running one-hander jumpshot si LeBron James gamit ang board dungan sa pagtingog sa final buzzer aron agakon ang hosts Cleveland Cavaliers nga kadaugan batok sa Toronto Raptors, 105103, sa Game 3 sa Eastern Conference semi-finals series sa National Basketball Association (NBA) 2018 Playoffs kagahapon.
Ang kadaugan maoy naghatag sa Cavaliers og dominanteng 3-0 nga bintaha sa series.
Sa kasaysayan, wala pa’y team sukad ang nakabangon gikan sa 0-3 nga biya sa bestof-seven series.
Human natabla ni Raptors rookie OG Anunoby ang duwa, 103-103, pinaagi sa three-point shot sa himatyong segundos, si James midawat sa bola gikan sa inbound dayon miataki sa wa nga bahin sa korte dayong itsa sa nakapadaog nga jumpshot.
Milanog ang abiba sa mga dumadapig sa Cavaliers sulod sa Quicken Loans Arena unya mipatong si James sa scorer’s table ug miisa sa iyang mga kamot sama sa iyang gibuhat dihang nakapasulod siya og three-point shot nga maoy nakapadaog sa Cavaliers batok sa Indiana Pacers sa Game 5 sa 1st round series.
“I’ve been doing that since I was like six, seven, eight years old,” matod ni James.
“Maybe even before that. There’s a picture floating around of me beside a Little Tikes hoop with a saggy Pamper on and I was doing it back then and all the way up until now, at 33.”
Ang four-time MVP nagpakatap og 38 puntos aron pangulohan ang kadaugan, niamot og 21 puntos ug 16 rebounds si Kevin Love samtang nitampo og 18 puntos si Kyle Korver.
“I ran out of words a while ago,” matod ni Korver, kinsa naglisod paghulagway sa laing mabayanihong nahimo ni James.
“I’ve seen him shoot that shot, that game-winner, countless times when he’s messing around in shootaround and practice. It’s always like, why would he shoot a shot like that -- to win a playoff game?”
Ang Raptors gipangulohan ni Kyle Lowry pinaagi sa iyang 27 puntos samtang nihatag og 18 puntos si Anunoby.
Ang usa sa labing sinaligan sa Raptors nga si DeMar DeRozan bati nga nakaduwa ug igo lang kining nihimo og walo ka puntos.
CELTICS 101, 76ERS 98
Sa Philadelphia, nakaipsot pinaagi sa overtime ang Bost0n Celtics sa grabeng pagpanghudlat sa hosts 76ers aron pagposte sab og 3-0 nga bintaha sa laing Eastern Conference semi-finals.
Sa dayong paghuman sa regulation period, nagtuo ang 76ers nga naangkon na nila ang kadaugan dihang nakapasulod og buzzer-beater si Marco Belinelli nga sa ilang tan-aw usa ka three-point shot.
Nagsaulog dayon ang 76ers ug ang ilang mga dumadapig unya nangatagak na ang confetti apan sa video replay, nakita nga dili three-point shot ang napasulod ni Belinelli hinungdan nga igo ra kining nakatabla sa duwa ug nakapugos sa overtime.
Taodtaod pa una napadayon ang duwa alang sa overtime gumikan kay kinahanglan pang limpyuhon ang nangatagak nga confetti.
“These are the kind of moments you want to be in as a basketball player,” asoy ni Al Horford, kinsa nakamugna og krusyal nga puntos sa himatyong segundos.
Ang Celtics gipangulohan sa ilang impresibong rookie nga si Jayson Tatum pinaagi sa iyang 24 puntos, nidugang og 18 puntos si Terry Rozier, niamot og 16 puntos si Jaylen Brown samtang nihatag og 13 puntos si Horford.
Ang 76ers gipangulohan ni Joel Embiid pinaagi sa iyang 22 puntos, nihatag og 18 puntos si JJ Reddick samtang nitunol og 14 puntos si rookie Ben Simmons./