2 KA BATA NANGAPAIG
LABING MINOS 90 KA BALAY NAUGDAW SA SUNOG SA ERMITA
Duha ka mga bata ang nangapaig ug labing minos 90 ka mga balay ang nangaugdaw sa sunog sa sitio Kawit, Barangay Ermita, siyudad sa Sugbo kagahapon sa kaadlawon.
Labing minos 10 usab ka mga tawo ang nangaangol sa sunog, kansang sinugdanan mao ang pagbuto sa gas stove.
Ang magsuong nakaplagan nga naggakos ug nangapaig giila nga silang Jovelyn, 9, ug ang 2 anyos nga si John Mark Digman, samtang luwas ang tulo nila ka mga igsuong sila si Jennelyn, Jovin ug Edwina nga nakaangkon og mga paso sa lawas.
Ang mga nangapaso mao silang Ida Alolod, Joel Digman, Jovin Alolod, Edwina Alolod, Sandra Echavez, Inday Echavez, Tirso Gucela, Rachel Napare ug Jennelyn Wagas.
Sa imbestigasyon sa kabomberohan sa syudad sa Sugbo, nagsugod ang kayo sa balay ni Ida Alolod nga nahimutang sa sudlonong bahin sa mga balay sa sitio Kawit nga daling mikatap sa mga silingang kabalayan nga ginama lang sa kahoy.
Giingong nagluto og sud-an si Ida nga iyang ibaligya nga pungko-pungko apan, nikalit lang pagsilaob ang kayo sa gas stove nga nidakop sa nagbukal nga mantika.
Matod ni Rexan Labrador, silingan sa pamilyang Alolod, nagpatabang kaniya ang bana ni Ida nga si Joel Digma nga luwason ang iyang anak nga naa sa taas nangatulog uban sa maguwang. Apan tungod sa kakusog na sa kayo, wa na nila kini masalbar pa.
“Kaming duha ni Joel, kanang papa aning mga bataa, among gisuwayan pagsulod ang balay kay kinugos man nako nang 2 anyos. Unya ako dili na man ko kasulod unya siya miahat gyud siya. Mao tong mura siyag niliso, pero napaso na iyang lawas. Wala gyud namo makuha ang bata,” asoy ni Labrador sa Superbalita Cebu.
Nadawat sa kabomberohan ang alarma sa sunog alas 5:46 sa buntag ug alas 6:05 giisa sa task force alpha ug alas 6:24 giisa nila sa task force bravo ug na control nila ang kayo alas 8:04 na sa buntag.
Gibana-bana sa Bureau of Fire Protection nga di mo menos sa P1.5 million ang danyos sa sunog.
Matod ni Fire Supt. Cesar Patrocinio Fire Marshall sa BFP Cebu Province sa ilang nakuha nga imbestigasyon nga nibuto ang gas stove nga maoy gigamit sa pagluto nilang Ida Alolod.
Nakasinati og kalisud ang mga bombero sa pag responde sa sunog tungod sa ka huot sa dalan nga halos di na makasulod ang ilang dagkong fire truck.
Tabangan sa Cebu City Government ang pamilya sa magsuong 2 ug 9 anyos kinsa napaig atol sa sunog kagahapon sa sityo Kawit, barangay Ermita.
Si Mayor Tomas Osmeña nagkanayon nga di pasagdan sa dakbayan sa Sugbo ang maong pamilya sanglit nakalas sila gumikan sa kalamidad.
Iyang gitahasan ang Department of Social Welfare and Services sa paghimo niini./