TIGOM ALANG SA PAGSULBAD SA TRAPIKO

Taas nga opisyal sa Land Transportation Office sa Central Visayas niawhag sa mga opisyal sa local government units nga gamiton ang ilang gahom aron maminosan ang kahuot sa dagan sa trapiko sa ilang mga lugar.

Si Victor Emmanuel Caindec, regional director sa LTO 7, niingon nga daghan og paagi nga mabuhat ang mga LGU aron paghatag og solusyon sa maong suliran sama sa paghimo og mga ordinansahon mahitungod sa trapiko.

“Importante na kay sila man naay knowledge unsang mga butang dapat nila bantayan sa ilang munisipyo o siyudad,” pamulong sa director sa pakighinabi sa Superbalita Cebu kagahapon.

Matod niya, dili pwede nga magsalig ang mga LGU ug gamiton ang mga nasudnong balaod, angay nga mohimo kini og lokal nga ordinansahon nga mapagaan ang problema sa trapiko.

Gawas sa traffic ordinances, nakita usab ni Caindec nga angayan nga motutok ang mga LGU sa pagbansay sa ilang mga tawo alang sa insakto ug maayo nga pagdumala sa dagan sa trapiko diha sa kadalanan, pahugtan ang pagdisiplina sa badlungon nga mga motorista, pagpalapad sa kadalanan ug pagbaton og maayo nga traffic management plan.

Si Caindec namahayag nga mahimo sila moisyu og temporary operator’s permit ngadto sa mga mayor isip mga deputized agent sa ilang buhatan.

Apan iyang giklaro nga dili mahimo ibalhin o iapud-apod sa mayor ang mga TOP ngadto sa mga traffic enforcer nga dili regular nga mga empleyado sa gobiyerno, sama sa giingon ni Office of the Presidential Assistant for the Visayas (OPAV) Assistant Secretary Anthony Gerard “Jonji” Gonzales.

Si Gonzales unang niingon nga mohangyo sila sa LTO nga i-deputize ang mayor sa LGU ug kini na ang moapudapod sa TOP ngadto sa mga traffic enforcer isip usa sa mga solusyon aron nga mahadlok magpabadlong ang mga motorista.