Soft Solutions sa OPAV
Atong gihangop kining gipangbutyag ni Jonji Gonzales, ang assistant secretary sa Office of the Presidential Assistant for the Visayas (OPAV), ngadto sa mga tigbalita kalabot sa ilang plano kon unsaon nga mahatagan og gamayng kasulbaran kining nagkagrabing problema karon sa trapiko dinhi sa Sugbo.
Matod niya, isip pagsanong sa mando sa iyang labaw nga si OPAV secretary Michael Dino, iya nang gihinagbo ang taga Department of Transportation (DOTr), Land Transportation Office (LTO), Regional Development Council (RDC), local government units (LGU) ug Metropolitan Cebu Development Coordinating Board (MCDCB) diin ilang gihisgutan kon unsaon nga maminus-minusan ang problema sa traf ic bisan og walay infra projects nga ipatuman.
Ilang gitumbok ug giila nga ang pagdisiplina sa mga jeepney drivers nga motahod sa mga traffic rules ug ang pagbutang og mga pick-up ug drop-off areas sa mga pasahero maoy duha ka mga solutions nga makatampo og gamayng kasulbaran sa problema.
Matod ni Gonzales nga sigon sa pagtuon sa Japan International Cooperation Agency (JICA) mokunhod og 30 porsiyento ang gibug-aton sa problema sa dagan sa trapiko, kon kini mapatuman.
Way lalis. Tinuod nga kining gipanglakbitan ni Gonzales nga gitawag nila og “soft solutions” mao gyud unta ang haom ug makatampog gamayng kasulbaran sa problema sa trapiko nga atong gisagubang karon.
Apan hinaot nga dili lang unta ni kutob ra sa istorya ug publisidad, kay sa pagkatinuod lang, dili problema ang pagpangita og solusyon kon dili ang pagpasunod niini.
Unsaon man pag-implementar niining maong solusyon kon kamo diha sa ibabaw nga bahin dili magkasinabot?
Tingali baya og napulos lang unya ta solusyon, unya wa gyud tay klarong implementasyon tungod sa sigi'g lalis.