‘Drug free’ sa inyong kagaral

Ang oversight committee nga gilangkuban sa Philippine Drug Enforcement Agency (PDEA 7), Cebu Provincial Anti-Drug Abuse Office (CPADAO), Department of Health (DOH 7) Department of Interior and Local Government (DILG 7), mideklarar na usab og onse ka mga barangay sa lalawigan sa Sugbo nga ‘drug free’.

Ang CPADAO nga gipanguluhan ni Ivy Durano Meca mao gyud ang mangusog aning pagdeklarar nga ‘drug free’ barangay aron ingnon lang gyud nga nag-trabaho sila ug aron siguro nga makadawat og pasidungog labi pa aning ‘seal of good governance award’ alang sa Provincial government.

‘Drug free’ sa ilang kagaral. Motuo kaha mo ani? ‘Drug free’ na kaha ning maong mga barangay? Pinasikad sa Dangerous Drug Board guidelines usa mahimo ang ‘drug free’ ang usa ka barangay mao kining nga mosunod;

1) non-availability of drug

supply

2) absence of drug den, pusher,

user

3) absence of clandestine drug

laboratory

4) active involvement of barangay officials in anti-drug activities

5) existence of drug awareness, preventive education and information

6) Existence of voluntary and compulsory drug treatment and rehabilitation processing desk.

Ari lang ta sa una ug ikaduha nga rekisitos nga walay drugas nga mikuyanap, walay pusher ug adik. Motuo mo nga wala ni sila? Asay may lugar karon diri sa Pilipinas nga wala hugpa-i og drugas? Asay lugar diri sa nasud nga walay pusher ug adik? Bisan wala magagikan ang drugas sa maong barangay, apan ang mga tawo sa barangay sulod-gawas lang. Kanang mga habal-habal drivers daghan diha ang ‘tulak' og drugas.

Wala man gani masumpo ang pagpalusot og drugas sa mga prisohan nato nga restricted o guwardiyado ang mga piniriso ug anaa lang sila sa usa ka lugar. Kana pa kahang lugar nga dili kontrolado ang mga tawo? Hununga na ninyo uy, gihimo lang ninyong kataw-anan ug inyo lang gi-ilad ang inyong kaugalingon.