Mahimo ra diay

Patay. Subo paminawon nga mao pa gani ang pagsugod sa kampanya sa piliay sa barangay ug sa Sangguniang Kabataan (SK), daghan nang nangamatay sa nagkalain-lain dapit nga gituhoan nga dunay kalabutan sa piliay sa Mayo 14.

Ang makahupay lang sa atong buot kay wa malakip sa balita ang mga dakbayan sa Sugbo, Mandaue, Lapu-Lapu ug Talisay sa patay nga may kalabutan ang piliay sa Mayo 14.

Matud pa sa taho sa Sunstar-Cebu nga sa 20 ka tawo na napatay, lima ani taga Soccsksargen o Region 12, upat taga ARMM, tulo taga Eastern Visayas (Region 8), duha sa Calabarzon (Region 4A) ug tag-usa sa Caraga Region, Davao, Bicol, Western Visayas, Central Luzon ug Cordillera. Nahitabo ang patay gikan niadtong Abril 14 ug hangtud sa Mayo 1, 2018.

Kining mga panghitabo sa patay nga may kalabutan ang umaabot nga piliay sa barangay ug SK makaingon ta nga maayo pa unta nga ibalik sa kaniadto nga panahon nga way alawans o sweldo ang mga opisyales sa barangay ug ang SK tinudlo.

Wa may lain rason nga atong makita ngano nga mosangko sa pinatyanay ang piliay sa barangay ug SK. Kini tungod ra gyud kay ang mga kandidato nag-apas sa ilang madawat kon mapili nga opisyal.

Ang katuyoan sa balaod sa SK aron makakat-on ang mga batan-on sa husto nga pamaagi sa pagdumala sa kagamhanan ug pag-alagad sa katawhan. Apan tungod sa sistema sa atong pamulitika ang atong kabatan-onan nahilo na hinuon sa dautan nga pamaagi.

MAHIMO. Ang gibabagan ni Bise Mayor Edgar Labella sa paghatag og cash aid ngadto sa mga benepisaryo sa DSWD tungod sa piliay sa Mayo 14 mahimo ra diay, matud pa sa Comelec.

Ang pagbabag ni Labella sa paghatag sa cash aid nakapaulbo sa kaspa ni Mayor Tomas Osmeña. Gani, iyang gitawag si Labella nga “obstructionist.”

Tungod sa pagbabag ni Labella ug sa piliay sa Mayo 14, si DSWD Legal Service Director Carlo Florendo Castro misuwat og pangutana ngadto sa legal department sa Comelec.

Si Atty. Maria Norina Tangaro-Casingal, Comelec Director IV mitubag nga ang DSWD basi sa Section 261 (v)(2) OEC libre sa gidili sa pagpanghatag og hinabang ngadto sa benepisaryo bisan atol sa piliay.

Tungod niini, si Castro miisyu og memorandum niadtong Abril 16, 2018 ngadto sa mga opisyales DSWD ug field

officers nga mahimo na sila motunol sa hinabang sa mga benepisaryo sa Sustainable Livelihood Program (SLP) ug sa 4Ps (Pantawid Pamilyang Pilipino).

Hinuon, giklaro ni Castro sa iyang memorandum sa mga opisyales sa DSWD nga sa paghatag sa hinabang sa mga benepisaryo kinahanglan walay mga pulitiko o kandidato nga mag-apil-apil.