Walay security of tenure

Daghan na ang nasulat sa mga mantalaan lakip diha sa social media kabahin sa walay kasegurohan sa seguridad sa trabaho tungod niining gitawag og “endo” sa miaging Adlaw sa Pamuo.

Apan nagbasa ko kabahin niining reklamo nga gisang-at sa usa ka dean sa University of Cebu, nakuratan ko nga bisan taas na ka og katungdanan, pwede ra man diay gihapon kang taktakon.

Mao kini ang nahitabo kang Ramon D. Peñaloza, kanhi sakop sa media nga nakauban nako isip beat reporter sa Cebu City Hall pipila na ka dekada nga milabay. Nahimo diay kini siyang dean sa UC ug OIC chairperson ug program head sa Criminology Department sa maong unibersidad.

Matod pa sa position paper ni Peñaloza nga nadawat sa National Labor Relations Commission (NLRC) sa miaging Mayo 4, 2018, wa niya damha nga gikan sa iyang kasuod kang UC campus director Dean Ofelia Maña, nikalit lang kini pagkausab.

Matod pa, tungatunga sa tuig 2017, dunay nahitabo atol sa usa ka pagbiyahe sa pipila ka sakop sa faculty ngadto sa Korea.

Pagbalik nila gikan sa maong byahe, kalit nga nausab ang pagtagad kaniya ni Dean Maña. Nahibong siya nga gipasanginlan na lang nga uyab sa usaka minyo nga sakop sa faculty bisan pa man og dili tinuod.

Matod ni Peñaloza, sugod na kini siging pagpangasaba ug pagpakaulaw. Human sa taas-taas nga panahon sa pagpailob, nidangop siya og tabang sa usa ka abogado.

Apan nisamot ang sitwasyon hangtod nga gi-dismiss siya. Sa pagkakaron, nisangat si Peñaloza og reklamo sa NLRC. Naa sab siyay kasong criminal nga grave oral defamation nga gisang-at diha sa Office of the City Prosecutor.

Unsa man diay ang nahitabo niadtong didto sila sa Korea nga nakapausab sa tinag-dan ni Dean Maña? Kay duna pa man kitay lain pang hisgutanan, tubagon ta kana sa sunod natong lindog.

PILIAY

Magpasalamat kita nga naklaro ra ang kontrobersiya kon mahimo bang makapanghatag og mga tabang nga cash ang DSWD atol sa kampanya niining election period.

Mao kiniy pamahayag sa law department sa Commission on Elections kabahin sa mga programa sa DSWD. Ug mao sab kini ang gipatuman sa DSWD.

Nitumaw ang maong kontrobersiya dinhi sa Syudad sa Sugbo dihang gitaho sa Sun.Star Cebu nga nireklamo si Bise Mayor Edgar Labella ngadto kang Presidential Assistant for Visayas Mike Dino kabahin sa pagpanghatag og tag P10 mil nga cash grant ubos sa Sustainable Livelihood Program (SLP) sa DSWD.

Matod pa sa taho, gipahunong sa DSWD Secretary ang pagpanghatag human gipaabot ni Dino ang maong reklamo.

Apan sukwahi diay ang gisunod nga lagda sa DSWD. Di lang unta magpataka sa pagpasalig ang OPAV aron dili mamumo ang ilang kaalyado sa Cebu City Hall.

@anol_cebu sa Twitter