Vision of love
Miinom ko sa akong pineapple juice samtang gitan-aw ko pag-ayo si Eman. Nagtungok siya morag dunay gihunahuna pag-ayo. Unya miinom sab siya sa iyang drinks. Mitan-aw siya nako. Ang iyang smile morag pinugos.
“Di ka motuo sa akong giingon nimo, Lyza? I’m serious.”
Nia mi karon si Eman sa Chowking sa Colon. Mao pay pagkahuman sa among klase. Nag-esnak mi kay parehas ming gigutom. Parehas ming nag-summer class. Sa usa ka subject nagkaklasmet ug nagkaila mi. Dali ra ming nagkasuod. Parehas ming taga lagyong probinsiya. Taga Leyte si Eman samtang ako taga Ozamis. Nia mi mag-eskuwela sa Cebu.
Gawas nga klasmet mi, dug-ol ra sab ang boarding house nga among gipuy-an sa Jakosalem.
“Allergic ka diay sa committment, Eman?”
“Well, maingon-ingon ana, Lyza. But to be honest, di ko ingon ani kaniadto.” Mikatawa ko. “Morag nakita ko na sa sine ug nabasa sa mga sugilanon ang imong estorya, da, Eman. Sure ko nga nakatilaw ka na sa kapait sa frustrations sa love.”
Mipahiyom si Eman. Mao gihapon, morag pinugos ang iyang smile. Di man matago ba ang iyang gibati. Sukad sa among pagkaila ug hangtod karon mamatikdan ang kaguol sa iyang mga mata. Matod pa bitaw sa mga tiguwang, naa sa mga mata madeskubrehan ang tinuod nga gibati sa usa ka tawo.
“Husto ka, Lyza. Daghan na ang nahitabo sa usa ka tawo ang nahitabo sa akong lovelife. Gibati kog true love kaniadto. But nagpalayo siya nako. Nakigtratog laing laki. Pero wa ko motagam. Pero ang nahitabo sa una kong gugma nahitabo og katulo pa gyud nako.”
“You mean nga upat ka girls ang nagbuhat nimo sa ingon? I mean, upat ka babaye ang nagduwa-duwa sa imong love?”
“Correct. Di ba sakit man, Lyza? Di na ko mobilib anang giingong true love, anang forever, anang committment.” “So?” “Duwa-duwa na lang sab ang ako sa mga babaye, Lyza.”
“Do’t tell me, Eman, nga usa ka panimawos nang imong gihimo diri namong mga babaye?”
Nakapanghupaw ko. Giangin ni Eman ang tanang babaye sa iyang pagtuo nga ang mga babaye pulos malimbungon, pulos maluibon. Unya, nakapanglingo ko. Anugon ang kaguwapo ni Eman nga gigamit lang niya sa pagpasakit sa mga babaye.