Ang tuba ni Geron

Dihang nakakanaog na si Geron sa lubi nga iyang gisanggutan maoy iyang nasiplatan didto dapit sa agianan paingon sa kamaisan si Hera. Sayod si Geron nga moanhi na pod kini kaniya. Sa banabana ni Geron pasado alas nuybe na sa kabuntagon ug iya nang dad-on ang tuba nga naa sa sulod sa iyang kawit ngadto sa iyang payag nga dili halayo gikan dinhi sa kalubihan nga iyang gisanggutan. Adto niya timplahig tungog nga pinulbos ang tuba didto sa iyang payag. Dayon isulod niya sa kontiner ug ihatod ngadto sa tindahan ni Inse Badang. Iyang nakita nga tua gyud paingon si Hera sa iyang payag.Mangayo na pod kini kaniyag lina nga tuba nga wala pa katimplahig tungog kay gusto lagi siya niini. Kada buntag gyud kini, usahay mosal-ang lang og tulo ka adlaw, pero dili gyud kini mopalta.

Si Hera may pagka bugay nga dalaga. Dili kini hilig og uyab-uyab. Dili kini siya igaton nga pagka babaye. Dili kini siya igaton nga pagka dalaga. Hinuon dili kini hilig og uyab-uyab. Dili kini siya igaton nga pagka dalaga laki. Ang iyang linihukan morag tomboy o lakin-on, pero guwapa kini. Anak kini ni Konsehal Undo Hipolito.

“Ron! Geron, nia na pod ko kay moinom kog tuba kanang wa pay tungog,” ni Hera dihang dinha na siya sa payag ni Geron.

“O, uy! Diay daghang lina diri sa akong payag,” ni Geron nga mitutok sa dalaga. Nagshorts lang kini ug natural sa usa ka lalake nga bation og kaibog, kay gawas nga puti og pamanit si Hera, seksi ug busok kaayog lawas, labi na ang mga paa niini.

“Ay, lamia sa imong tuba, uy, Geron!” ni Hera human molad-ok sa tuba nga way tungog gikan sa hungot nga gidunol ni Geron.

“Salamat, ha, Hera. Tam-is nga apod-apod man kining akong tuba.”

“Tam-is gyud ang imong tuba. Naay tuba ni Isko, sus, aslom kaayo, uy!”

Unya misugod nag panimpla si Geron sa tungog diha sa tuba.

“Ron, uyab diay mong Mercedes?” ni Hera. “Ayaw ana niya, uy! Playgirl man na siya. Daghan na siyag uyab dinhi sa ato. Ikaw nga manananggot lang, na, duwa-duwaan lang ka ana niya.”

“Sige lang god, Her,” ni Geron. “Kon iya kong binuangan, wa koy mahimo,” ni Geron nga nagpadayon sa iyang pagpanimpla sa tungog ngadto sa tuba.

Unya nagpahibawo si Hera nga molarga na siya ngadto sa California, USA, Miabot na man ang mga papeles sa petisyon sa iyang Mama nga usa na ka American citizen didto.

“Sige. pag-ayo-ayo didto, Her! Mingawon man sab ko nimo kay wala nay mangayo nako’g tuba nga way tungog,” ni Geron.

“Mingawon sab ko sa imong tuba nga tam-is apod-apod, Ron!” ni Hera nga mitingsi. “Babay, ha, Ron! Ug ayaw baya patunto ni Mercedes, ha?!”

DUGAY na kadto, pero alang kang Geron kanunay kining lab-as sa iyang handurawan. Dili gayud siya malimot sa dalaga nga moanhi sa iyang payag ug moinom sa tam-is niyang tuba nga wa pay tungog. Ulitawo siyang guwang hangtod karon. Bahin kang Mercedes, husto gayud si Hera kay si Mercedes palikera ug ang resulta, napaangkan si Mercedes ug karon dako na ang bata. Naluoy si Geron kang Mercedes.

Milantaw si Geron sa agianan paingon sa kamaisan. Iyang nakita ang usa ka binuhat nga pamilyar sa iyang panan-aw. Dili siya mahimong masayop. Si Hera ang iyang nakita nga nagpaingon sa iyang payag.

“Si Hera. Gikan siya sa Amerika!” tuaw ni Geron nga naglumpat-lumpat ang diwa. “Heraaa! Heraaa! Nia lagi ka. Kagwapa na nimo, uy!”

“Nia ko. Nangutana ko didto sa ubos kon minyo ka na ba. Ingon nila wala pa!” matod ni Hera. “Parehas ta, Ron. Dalaga pa gihapon ko. Gimingaw na ko sa imong tuba, uy! Way tuba didto sa Amerika.” Nagpahiyom si Hera nga mitutok kang Geron.

Dihay nabatyagan ni Geron nga pagbati ug kini nagapitik didto sa kinauyokan sa iyang kasingkasing.