WARRIORS-ROCKETS FINALS NAHULMA

Houston, Golden State midabo-dabo sa Utah, New Orleans sa Game 4

Mialisngaw na ang giatangang panagharong sa Golden State Warriors ug Houston Rockets alang sa inilugay sa titulo sa Western Conference human nila yanong gipangmakmak ang ilang tagsatagsa ka kontra kagahapon nga parehong naghatag kanila og 3-1 nga bintaha sa conference semi-finals series sa National Basketball Association (NBA) 2018 Playoffs.

Ang Warriors, nga maoy defending champions, ningihaw sa hosts New Orleans Pelicans, 118-92, samtang ang Rockets, nga maoy No.1 overall team, ninglampaso sa hosts Utah Jazz, 100-87.

Usa na lang ka daog ug mahinayon na ang gilaumang panagtagbo sa Warriors ug Rockets sa Western Conference finals.

Nagbangis og maayo si Kevin Durant ug gipangulohan niya ang kadaugan sa Warriors pinaagi sa iyang 38 puntos gikan sa 15-of-27 shooting.

“I just try to tell myself that I’m at my best when I don’t care what happens after the game, the outcome or anything,” asoy ni Durant.

“That’s when I’m free and having fun out there, and forceful. That was thing -- just try to play with force no matter if I missed shots or not, just keep shooting, keep being aggressive.”

Ang laing pambato sa Warriors nga si Stephen Curry nagkanayon nga sa kainit sa duwa ni Durant, ilaha kining gilawgan kanunay sa bola gikan sa pagsugod hangtod na sa katapusang gutlo.

“Just find ways to get him in scoring positions. Sometimes, that’s not really hard to do -just throw it to him,” batbat ni Curry.

“Just keep the game simple at that point because he’s such a great scorer, you don’t have to really overthink things.”

Si Curry miamot og 23 puntos alang sa Warriors, nidugang og 13 puntos si Klay Thompson samtang nihatag og 12 puntos si Quinn Cook.

Ang Pelicans gipangulohan ni Anthony Davis pinaagi sa iyang 26 puntos ug 12 rebounds, nitampo og 20 puntos si Etwaun Moore samtang nitunol og 19 puntos si Jrue Holiday.

“We didn’t have the looks we normally have. We pressed a little bit when we got behind,” matod ni Pelicans coach Alvin Gentry.

Hinuon bisan pa sa ilang malisod nga sitwasyon, malaumon gihapon ang Pelicans nga makabangon sa series.

“We missed a lot of easy shots, a couple game-plan discipline mistakes early on and they came out on fire. We just can’t afford to shoot that poorly,” asoy ni Davis.

“But we’ve got another one. Any time we’ve been punched in the mouth, we’ve always responded very well.”

Sa Salt Lake City, si Chris Paul nagpakatap og 27 puntos ug 12 rebounds samtang nidugang og 24 puntos si James Harden aron pangulohan ang kadaugan sa Rockets.

Sa kasagaran ning maong season, si Paul nagsilbe lang sidekick ni Harden apan ning duwaa, siya ang Batman ug si Harden ang Robin.

Gawas sa iyang opensa ug depensa, maayong nakagiya si Paul sa pointguard nga posisyon gikan sa sinugdanan hangtod sa katapusan.