MASUSO NAPALGAN SA UMAPAD DUMPSITE
Tungod sa pagkisi-kisi sa plastic grocery bag nga gibitay sa kural sa Umapad dumpsite, Mandaue City, nadapit ang pagtagad sa usa ka residente ug nasuta nga masuso diay ang sud niini.
Asoy sa hepe sa City Social Welfare and Services, Jessie Perez, nga bisan wa maghilak ang bata, ang pagpunay og lihok sa plastic bag maoy naka-aghat sa maong concerned citizen sa pagsusi.
Sa dihang gibukhad ang sudlanan, nakuratan ang residente sa dihang nakit-an ang masuso nga natuwad ang posisyon.
Dali niya nga gi-report ang pagkaplag sa masuso sa Police Station 5 sa Mandaue City Police Office kagahapon sa sayo sa buntag.
Sumala pa ni Perez nga gibana-bana nga anaa pa sa lima ka adlaw gikan sa pagkatawo ang masuso.
Kasamtangan nga gipa-ubos sa medical examination ang masuso ug hangtod karon wa pa matino kon kinsay inahan o ginikanan nga nihimo sa ingon.
Matod pa ni Perez diin sa ilang buhatan kasamtangan nga gikustodiya ang masuso, gitambagan sila sa mananambal nga ipa-admit sa tambalanan sa dihang nakita nga yellowish ang kolor sa pamanit niini.
Matod ni Mandaue City Vice Mayor Carlo Pontico Fortuna sa iyang Facebook post nga kay kapistahan man ni St. Joseph, patron sa Dakbayan sa Mandaue kagahapon, ilang ginganlan ang bata og Joseph.
Giatiman ang masuso sa City Social Welfare Office nga maoy gitahasan.
Sa Facebook post sa Superbalita Cebu, dunay pipila ka ka mga tawo nga gustong mosagop sa masuso.
Apan ang proseso sa Pilipinas sa pagsagop og bata di masayon tungod sa agian niini.