HUBOG GIPUTLAN SA ULO

GIINGONG MALDITO SA LUGAR

Gitumbok nga maldito napalgang patay nga giputlan na og ulo niadtong Lunes sa alas 8 sa buntag sa Brgy. Matun-og, lungsod sa Balamban, Sugbo.

Si Porfirio M. Petaled, 45, minyo, mag-uuma, napalgan sa iyang mga silingan ug mga tanod nga nagbuy-od nga naglunang sa kaugalingong dugo samtang ang ulo niini nabuwag pipila ka metros ang gilay-on sa lawas diha dalan.

Si Inspector Celso Tadique, deputy police chief sa Balamban nga nahinabi sa Superbalita Cebu, nagkanayon nga si Petaled katapusang nakit-an nga nag-inom niadtong Dominggo atol sa tabo sa barangay uban kang Joel Mahinay. Si Mahinay mao karon ang

person of interest sa kapulisan nga ilang gipangita.

Ang kapulisan gipahibalo ni Brgy.Captain Honey Trinidad Baynarja sa Brgy. Matun-og, kinsa personal nga ni-report sa kapulisan kabahin sa tawo nga giputlag ulo.

Matod ni Tadique nga si Petaled giilang maldito sa dapit basi sa ilang nakuhang impormasyon.

Giingong magmaoy usab kini kon makainom ug sagad sa mga ika-inom niini mahitabo nga magkaaway.

Apan way tawo nga nakakita dihang gitigbas si Petaled sa makadaghang mga higayon ang ulo, lawas ingon man liog hangtud naputol.

Ang lawas niini ingon man ulo nakit-an pipila lang ka metros ang gilay-on gikan sa giimnan niini sa taboan sa maong barangay.

Sumala pa ni Tadique nga dako ang posibilidad nga kaatraso ni Petaled ang mipatay kaniya ug posibling giatangan dihang padulong mopauli.

Samtang gipangita pa nila si Mahinay aron makuhaag habig.

“Naa daw ni siyay daghang gikaaway diha. Siguro giatangan ni sa pagpauli nga hubog gitigbas giputlan sa liog,” dugang ni Tadique.

Mismo ang mga kabanay ni Petaled nikompirmar nga maoy gyud kini mangitag away sa ilang lugar. /