■PERSONAL O NEGUSYO.
Gitan-aw sa kapulisan sa Lapu-Lapu City ang personal o negusyo nga motibo sa suway nga pagpatay sa consultant sa Lapu-Lapu City Hall nga si Junaid Macasalong Daligdig, 56, sa may Barangay Basak, niadtong Lunes sa hapon. Makita sa CCTV footage grab sa Barangay Basak ang tulo ka mga motorsiklo nga nagsunod kaniya (ubos) ug ang actual nga pagpusil (ibabaw).
Personal o negusyo ang gitan-aw sa kapulisan sa Lapu-Lapu City nga posibleng motibo sa tinguhang pagpatay sa consultant sa Lapu-Lapu City Hall sa may Barangay Basak niadtong miaging adlaw.
“Dili ni siya election related. Siguro sa business o personal (motibo),” matod ni Lapu-Lapu City Police Director Supt. Rommel Cabagnot sa mga tigbalita.
Sa imbestigasyon sa Police Station 4, nasayran nga si Junaid Macasalong Daligdig, 56, nagsubay sa dalan sa Basak-Iba samtang nag-inusara og maneho sa iyang puti nga pick-up, gipusil sa mga riding in tandem nga nagsunod kaniya.
Si Daligdig nakaangkon og samad pinusilan sa baba, liog ug buko-buko ug gidala sa pribadong tambalanan sa dakbayan sa Sugbo, diin siya gikatahon stable ug nagpaalim sa iyang mga samad.
Ang kabanay ni Daligdig nga niduaw sa Police Station 4 nagkanayon nga wa silay nasayran nga adunay gikabangi si Daligdig.
Wa pa mailhi ang mga gunman nga luwan sa tulo ka mga motorsiklo.
Base sa kuha sa CCTV camera sa Barangay Basak, ang usa sa mga angkas sa motorsiklo maoy namusil sa nagdagan nga pick – up.