Mga kawani sa City Hall mosilbe sa Comelec alang sa barangay elections?

Mayor Tomas Osmeña gipasanginlan nga nakigkonsabo sa Commission on Elections- Cebu City aron sigurado nga modaog ang iyang mga kandidato sa umaabot nga barangay ug SK elections.

Si Kapitan Ramil Ayuman sa Barangay Apas ni-post sa Facebook nga adunay mga empleyado sa Cebu City Hall nga gipasakop sa board of election tellers (BET) diha sa Apas.

“Kay kaning si tombully gipasud ang mga empleyado sa City Hall isip poll clerk ug third member. Ako duda nagkonsabo ni si tombully ug taga Cebu City Comelec. Sa higayon akong mahibaw-an, di gyud mo magmahay,” tipik sa post ni Ayuman.

Apan ang pasangil gihimikak ni Osmeña.

Matod ni Ayuman nga sa Apas, adunay igsuon sa department head sa City Hall nga gihimong sakop sa BET ug laing paryente sa kanhi department head ang gidestino sa samang barangay.

Aduna say magtutudlo sa Opra sa barangay Kalunasan kansang mama loyalista ni Osmeña ug kadugo sa ilang kontra pagkakapitan sa barangay nga maoy niatbang ni Alfie Ayuman nga iyang asawa.

Si Acting Regional Director sa Comelec nga si Atty. Veronico Petalcorin nagkanayon nga ila pang susihon ang mga ngalan.

Iyang gibutyag nga wala sab sila makadawat og lista gikan ni Osmeña labot sa mga kawani sa City Hall nga ilakip sa BET.

Si Konsehal Joey Daluz ug Bise Mayor Edgardo Labella nanawagan sa Comelec nga ipatangtang ang mga ngan sa maong mga kawani sa City Hall sanglit dili kini makatarunganon.

Giawhag usab ni Ayuman ang iyang mga kaalyado nga kapitan sa pagsusi usab sa mga sakop sa BET diha sa ilang tagsa-tagsa ka mga barangay.