P2.7 million nga balor nga puno-an sa marijuana gipang-ibot

Liboan ka mga punoan sa marijuana ang gipang-ibot sa mga sakop sa City Mobile Force Company (CMFC) sa Cebu City Police Office sa sitio Mit-ol barangay Tagba-o, bukirang bahin sa syudad sa Sugbo.

Gibana-bana sa kapulisan nga moabot ngadto sa P2,780,000 ang balor sa marijuana nga gikonsiderar nga usa ka illegal drugs.

Matod ni Supt. Timmar Alam, hepe sa CMFC, nga usa sa ilang asset sa bukid ang mipahibawo kanila nga adunay plantation sa marijuana sa hilit nga dapit nga hapit nang ma harvest.

Tungod niini nakig-alayon dayon ang kapulisan sa syudad sa Sugbo sa Philippine Drug Enforcement Agency-7 inabagan sa Naval Forces Central ug ila dayon nga gilusad ang operation.

Moabot ngadto sa 6,950 ka punoan sa marijuana ang gitanom sa 1,500 square meter sa luna nga gipanag-iya sa gobiyerno.

Tungod sa kalisud sa lugar ug sa kabakilid niini nakahukom ang kapulisan ug ang PDEA-7 personnel nga didto nalang sunogon ang naibot nga punoan sa marijuana.

Wala hinuon makadakop ang mga operatiba sa nag- tanom niini sanglit wala silay naabtan nga tawo sa dapit.

Apan matod ni Supt. Alam nga aduna silay gipang dudahan nga naa ra usab nagpuyo duol sa lugar diin na diskobrehan ang nahisgutang plantation.

Naa tay mga pangalan sa nag tanom pero mga alyas pa lang lagi, dili lang sa nato ang-angon, so kinahanglan ma identify nato ang ilang full name then makuhaan nato silag ebedensya,” matod ni Alam.

Nakamatikod si Alam nga daghan ang ilang nadiskobrehan nga marijuana plantation sa mga bukirang barangay sa syudad sa Sugbo ug sa silingan niini lugar sa bukid tungod sa kanihit sa illegal nga drugas.

Aduna pay mga dapit sa bukid ang giingong adunay mga tinanom nga ilang isunod sa pag ibot sa mosunod nga mga adlaw.