Gamay nga puntil
Kada buntag tig-hayk si Tony gikan sa iyang balay nga nahimutang luyo sa munisipyo sa Carmen ngadto sa Kilometro 43 sa Barangay Puente. Kasagaran, alas singko-imedya iyang igikan. Makabalik siya sa ilang balay mga alas siyete na. Naa siya mag-alagad sa munisipyo isip drayber sa ambulansiya.
Samtang nag-hayk siya karong buntaga may nakapadani sa iyang pagtagad. Mibalik na siya sa iyang agi ug diha na siya duol sa Kilometro 42. May napatiran siyang usa ka gamay nga butang. Abi niya’g usa lang ka sagbot. Mikaliring kini pagkaigo sa iyang tuo nga tiil. Gitan-aw una niya. Usa kini ka gamay nga puntil, sama kadako sa palad sa usa ka puya. Itom ang bulok ug may mga ribite nga puti ug pula. Ang maong puntil usa diay ka talagsaong ‘coin purse’ nga may siper sa tunga.
Gipunit ni Tony ang coin purse. Giablihan niya’g gamay ang siper. May migimaw nga papel de banko. Milingi-lingi siya sa palibot. Way tawo sa duol nga nakakita sa iyang gibuhat. Gisera niya’g balik ang siper ug gisulod sa tuong bulsa sa iyang short pants. Adto niya tiwasa’g tan-aw sa ilang balay ang iyang kinit-an.
Didto sa ilang balay giyagyag ni Tony sa lamesa ang tanang sulod sa puntil. May duha ka kuwartang papel nga tag-bayinte pesis nga giayo og pilo. May usa ka biyugol (coin) nga singko pesos ug may 16 ka biyugol nga tag peso. Saysintay-uno ka pesos ang sulod sa puntil. Gisulod kini niyag balik sa puntil ug gisirhan.
Kadaghan na si Tony makakita og mga biyugol daplin sa karsada. Di lang niya puniton kay kasagaran ana linabay sa mga drayber o konduktor sa mga purlon nga moagi nga may kargang minatay paingon sa menteryo.
Misantop sa hunahuna ni Tony nga ang tag-iya sa puntil dili makaluluoy kay gamay ra man ang kantidad. Apan nakahukom siya nga sunod buntag inig hayk niya iyang iuli ang puntil sa dapit diin niya kini hipuniti, kay nahinumdom man siya sa pulong sa iyang ugangan nga nag-ingon, “Ayaw gyud mo pamunit og bisan unsang butang nga inyong makit-an sa karsada ilabi na kon dunay kuwarta, kay posible nga gituyo na’g hulog sa tag-iya nga moingon, “Sa makapunit niini, adto mobalhin ang akong sakit!” Mga pulong kini ni tatay Inting niya usa ka higayon nga sila nagkahinabi.
(KATAPUSAN)