STANDHARDINGER MODUWA NA'S SMB
Mga duwa karon
4:30 pm-Columbian Dyip batok Rain or Shine
7:00 pm-San Miguel batok Meralaco
Magtutok ang atensyon ngadto kang Fil-German Christian Standhardinger sa labing una niining pagduwa sa San Miguel Beermen karong gabii sa Philippine Basketball Association (PBA) Commissioner’s Cup sa Mall of Asia Arena.
Si Standhardinger maoy gikuha sa Beermen isip No.1 overall pick sa miaging rookie draft apan wala kini nakapakita og aksyon sa tibuok Philippine Cup gumikan kay aduna pa kini obligasyon sa Hong Kong squad sa Asean Basketball League (ABL).
Sa main game karong gabii, si Standhardinger moduwa na sa Beermen batok sa Meralco Bolts.
Ang paghiabot ni Standhardinger tatawng makadugang og lig-ong haligi sa Beermen sa ilawom nga bahin nga gipuwestuhan nang daan sa Sugbuanong higante nga si JuneMar Fajardo.
Idugang pa ang ilang import nga si Troy Gillenwater, maingon nga lisod na gyud lumpangon ang ilang haligi sa ilawom.
Ang Meralco aduna sa’y dekalidad nga import nga si Arinze Onuaku apan dili ikalimod nga maglisod kini sa pagpakigparang sa mga pambato sa Beermen sa ilawom.
Taas hinuon ang moral sa Bolts paingon ning duwaa gumikan kay gikan sila sa dakong kadaugan batok sa NLEX Road Warriors, 106-90.
Ang Bolts adunay 2-1 nga rekord samtang mao pa lang kini ang labing unang duwa sa Beermen ning maong komperensya.
“He’s a consistent double-double performer. He’s even delivering 30-point games. He just had a hard time in the last two games as he had to contend with Renaldo Balkman and Justin Brownlee. His import partner was a mere role player,” matod ni San Miguel coach Leo Austria kabahin kang Standhardinger.
Sa premirong duwa, magsangka ang Columbian Dyip ug league-leader Rain or Shine Elasto Painters.