Mayweather nangita'g boksidor sa Pilipinas
Sa iyang paghiabot sa Pilipinas kagahapon, si retired boxing superstar Floyd Mayweather Jr. daling mibasura sa mga pagtuo kabahin sa posible nilang panagharong og balik ni Filipino boxing icon Manny Pacquiao.
Giklaro ni Mayweather nga wala na siya’y planong moaway og balik human niya naposte ang perpektong 59-0 nga rekord sa miaging tuig pinaagi sa pag-knockout kang Conor McGregor.
“I’m an old man now. There’s no more fighting for Floyd Mayweather,” matod sa 41 anyos nga boxing legend.
Hinuon sa iyang pagbisita sa Pilipinas, wala gisirado ni Mayweather ang isyu kabahin sa boksing.
Gipasabot ni Mayweather nga nagplano siyang mokuha og Pinoy nga mga boksidor alang sa iyang Mayweather Promotions.
“I would love to sign some upcoming talent, upcoming Filipino talent,” matod ni Mayweather sa interbyu sa ABSCBN News.
“I would love to work with them – myself and Mayweather Promotions.”
Basi sa ilang website, ang Mayweather Promotions adunay 37 ka mga boksidor nga ubos sa ilang pagdumala.
Gawas sa pagpangita og potensyal nga Pinoyng mga boksidor, nagkanayon nga usa sa iyang tuyo ug tumong sa pag-anhi sa nasod mao ang paglingawlingaw.
Si Mayweather miabot sa Manila alas 3:00 sa kadlawon kagahapon sakay sa private jet.
Nakigduwa si Mayweather og basketball sa Pinoy nga mga kaatbang dayon mibiyahe kini paingon sa El Nido, Palawan diin mainiton siyang gisugat sa mga Pinoy.
Sa dihang gipangutana kon aduna ba siya’y intensyon nga makigkita kang Pacquiao, kinsa iyang gilupig niadtong 2015, si Mayweather mibuhi pg pasumbingay nga tubag.
“I would like to meet all the great people in the Philippines,” matod ni Mayweather.
Sa laing bahin, mihatag si Mayweather sa iyang panahom kabahin sa umaabot nga away ni Pacquiao batok kang World Boxing Association (WBA) welterweight king Lucas Matthysse karong Hulyo 16 sa Kuala Lumpur, Malaysia.
“That’s a good match-up, a very exciting fight,” batbat ni Mayweather.
“Manny Pacquiao and Lucas Matthysse are great fighters. So it’s a great match-up. They are both former world champions, so it should be a very, very good fight.”