CAVS MINGBALIK SA EAST FINALS
Gisiruhan na sab ang Raptors, 4-0, sa NBA Playoffs series
Sa ikatulong sunodsunod nga season, gibutlogan sa Cleveland Cavaliers ang Toronto Raptors, 4-0, sa ilang panagharong sa National Basketball Association (NBA) Playoffs series.
Ning higayuna, gipabarog og balik sa hosts Cavaliers ang ilang dominasyon batok sa Raptors pinaagi sa pagposte og 128-93 nga kadaugan sa Game 4 nga maoy naghuman og sayo sa ilang 2018 Eastern Conference semi-finals series kagahapon.
Sama sa naandan, gipangulohan na sab ni four-time MVP LeBron James ang Cavaliers pinaagi sa iyang 29 puntos ug 11 ka assists, nidugang og 23 puntos si Kevin Love, niamot og 16 puntos si Kyle Korver, nidugang og 15 puntos si JR Smith samtang nitunol og 12 puntos si George Hill.
Bisan sa ilang dominasyon ning maong series, si James nakadayeg gihapon sa Raptors, nga no.1 team sa Eastern Conference human sa regular season. “They were a well-balanced, put-together team this year,”
matod ni James kabahin sa Raptors. “They’ve built a very good team that can succeed in the postseason. I felt coming into the series this would be a tough challenge for us.”
Apan basi sa resulta ning maong series, kuwang gihapon ang puwersa sa Raptors kumpara sa Cavaliers.
Ang Raptors gipangulohan ni Jonas Valanciunas pinaagi sa iyang 18 puntos, nihatag og 13 puntos matag usa sila si CJ Miles ug DeMar DeRozan samtang nitunol og 12 puntos si Serge Ibaka.
Ang usa sa labing pambato sa Raptors nga si Kyle Lowry igo lang nakamugna og lima ka mga puntos. “They wanted it more than us,” batbat ni Valanciuas.
Gikontrolar og sugod sa Cavaliers ang duwa pinaagi sa 12-0 run sa nahabiling 2:12 minutos sa 1st half. Aduna pa’y higayon nga miabot og 30 puntos ang labaw sa Cavaliers.
76ERS 103, CELTICS 92
Sa Philadelphia, makakita pa’g laing pagsidlak sa adlaw ang hosts 76ers human nila nabawsan ang Boston Celtics sa Game 4 sa ilang kaugalingong Eastern Conference semi-finals series.
Ang kadaugan maoy nakapahak sa bintaha sa Celtics, 3-1, sa best-of-seven nga kombati. Ang 76ers gipangulohan ni Dario Saric pinaagi sa iyang 25 puntos, ninghatag og 19 puntos matag usa sila si Ben Simons ug T.J. McConnell samtang niamot og 15 puntos si Joel Embiid.
Bisan nalubong sila sa series, ang mga dumadapig sa Philadelphia taas gihapon og enerhiya sa pag-abiba nga tatawng nakadugang og kadasig sa magduduwa sa 76ers. “I can tell you the Philadelphia 76ers spirit is just fine,” matod ni 76ers coach Brett Brown.
Ang Celtics gipangulohan ni rookie Jayson Tatum pinaagi sa iyang 20 puntos samtang nihatag og 17 puntos si Marcus Morris.
Ang Game 5 motapon sa Boston./ESL