Silot sa anti-cluttering sa siyudad sa Mandaue tinguhang pabug-atan
Buot sa usa ka opisyal nga nagdumala sa North Reclamation Area (NRA) nga usbon ang ordinansa sa dakbayan sa Mandaue nga nagsilot sa mga dagkong truck nga maglapoklapok sa kadalanan sa dakbayan.
Si assistant city administrator Marvin Soco niingon nga imbes multa ang atubangon sa moagi sa dakbayan nga maghugawhugaw sa dalan, buot niyang tangtangan og business permit ang tag-iya sa mga truck nga nilapas sa ordinansa sa ikatulong opensa.
“Proposal lang ni atoa, kay if you don’t do that, magbalikbalik ra gihapon na (sila og hugawhugaw sa dalan) kay di man mahadlok kay they can afford to pay. Kay kaya ra man. If you’ll do that pabug-atan ang penalty, you’ll think twice (na nga molapas),” ni Soco sa dihang nahinabi sa mga tigbalita.
Matod ni Soco nga daw wa mahadlok ang mga truck nga mag-agian sa Mandaue nga makabayad sa multa kalabot sa anti-cluttering ordinance sa dakbayan.
Base sa maong ordinansa, ang multa sa unang opensa sa makalapas niini anaa sa P1,000, P2,000 sa ikaduhang opensa ug P5,000 sa ikatulong opensa.
Gawas sa huyang ang implementasyon sa ordinansa, laing hagit sa kagamhanan sa dakbayan mao nga way igong kawani ang Mandaue nga molimpyo sa mga lapok nga mauga sa dalan.
Sigun ni Soco nga delikado sa disgrasya sa mga motorista ang lapok sa nga mahimong hump kon mobantok samot na kon kini magupok kay mamahimo kining abog.
Gawas sa mas bug-at nga silot, laing duha ka proposal sab ang giduso ni Soco ni Quisumbing nga iya sab gipahibalo sa mga nanag-iya og yarda nga mga kompanya sa NRA.
Saysay niya nga buot niyang sementuon ang atubangang bahin sa mga yarda sa NRA tungod kay iyang nabantayan nga di kini konkreto og lapukon kon mag-uwan.
Ikaduha mao nga gitahasan niya ang mga yarda nga magbutang og pressure washer sa mga ligid sa ilang truck sa sulod og gawas aron limpyo nang daan pagsud ug gawas ang ligid sa truck.
“Once mogawas na sila sa ilang yarda, limpyo na sila ug less ang problema sa road cluttering. Mayor Quisumbing was able to read it already, and I was just happy nga gipa- check niya sa city legal just to check on the legality. Opinion sa legal sa di pa i-endorse sa Sanguniang Panlungosd to amend the existing ordinance,” paambit ni Soco.