MGA NARCO BARANGAY OFFICIALS TUKHANGON

Kapulisan sa syudad sa Sugbo andam mo tokhang sa mga barangay officials nga nalakip sa listahan sa Philippine Drug Enforcement Agency nga gitawag nga narco politicians.

Kini maoy gibutyag ni Cebu City Police Office Director Sr. Supt. Joel Doria.

Sa miaging duha ka semana ang buhatan Philippine Drug Enforcement Agency (PDEA) didto sa Kaulohan, mipublikar sa kapin duha ka gatus ka mga kapitan ug konsehal lukop nasud nga nalambigit sa illegal nga drugas diin tulo niini naa sa probinsya sa Sugbo.

Matod ni Sr. Supt. Doria nga kung aduna na silay listahan gikan sa PDEA sama sa ilang gihimo sa mga drug personalities dinhi sa syudad sa Sugbo andam sila nga molusad sa oplan tokhang aron ipa surrender kini.

“Mandato natin yan to assist PDEA and campaign against illegal drugs, and one of our mandate is to conduct tokhang kung may mga involvement sila, so pakikiusapan natin na mag surrender” matod ni Sr. Supt. Joel Doria.

Sa 80 ka barangay sa syudad sa Sugbo walay bisan usa ka kasamtangan ug kanhi opisyal sa barangay ang nalakip sa narco politicians sa PDEA.

Apan matod sa PDEA-7 nga aduna pay 274 ka kapitan ug konsehal ang isunod sa pag publikar diin dako ang posibilidad nga duna na sa syudad sa Sugbo nga manganlan.

Si Doria miawhag sa publiko ilabi na nga nagkaduol na ang eleksyon nga sila na mismo ang mosusi kinsa kining mga kandidato sa ilang barangay nga nadudahan nga apil sa illegal drug trade nga angayang dili botaran.

Ang PDEA-7 ug ang Cebu Provincial Police Office una nang mitug-an nga aduna nay kapin sa 20 ka mga kandidato nga apil sa negosyo sa illegal nga drugas.