Mga kandidato sa Lapu-lapu gipahimatngunan ni Radaza

Gibadlong ni Lapu-Lapu City Mayor Paz Radaza ang mga kandidato alang sa synchronized Barangay ug Sangguniang Kabataan election ilabi na niadtong nagpataka og taod o papilit sa ilang campaign materials.

Gumikan niini, niluwat si Radaza og memorandum nga nagpahinumdum sa mga kandidato may labot sa pagtamod sa “Fair Elections Act” nga gipatuman sa Commission on Elections (Comelec).

Namatikdan nga adunay mga campaign materials nga gipamutang gawas sa authorized common poster areas sama sa poste sa kuryente ug sa ubang mga publiko nga lugar ug government properties.

Nakita nga ang Barangay Pusok ug pipila ka bahin sa Barangay Mactan ang adunay mga campaign materials nga nakalapas sa maong balaodnon. Wa pa masusi ang ubang barangays.

Base sa natala sa “Fair Elections Act” gidili ang pagpamutang og campaign flyers o poster sa mga waiting shed, sidewalk, kalsada, lamp post, electric post ug wire, traffic signage ug ubang signboards nga anaa sa publiko nga dapit, pedestrian overpass ug underpass, flyover, tulay, center islands sa dalan, tunghaan, public shrines, barangay hall, government offices, health center, public structures ug buildings ug public transport terminal, airport, seaport, dock, pier ug uban pa.

“Hinaot nga ilang (kandidato) sundon ang ruling sa Comelec. Naa ra bay uban naa sa poste ug kahoy gipamutang,” tipik sa pamahayag ni Radaza.

Samtang kadtong magmagahi sa pagtumam niini ang election officer mopahamtang og tukmang silot batok niadtong mga kandidato nga malapason.

Ang ABC office maoy gitahasan sa pagpang apod-apod sa memorandum.