Hepe sa probinsiya sa Sugbo, Negros Oriental gipanghulipan

Mga hepe sa kapulisan sa probinsya sa Sugbo ug sa probinsya sa Negros Oriental ang lakip sa gipanghulipan sa kampo Crame taliwala ning nagkaduol na kaayo ang piniliay sa Sanggunikang Kabataan (SK) ug Barangay Election.

Mipagawas og kamandoan ang kampo Crame kalabot sa lahugay niadtong Mayo 8 ngadto sa pipila ka mga provincial ug city directors lukop nasud tungod sa piniliay karong Lunes.

Ang naapektahan sa maong lapad nga lahugay mao ang si Cebu Provincial Director Sr. Supt. Edgar Alan Okubo ug ang hepe sa Negros Oriental Provincial Police Office nga si Sr. Supt. Edwin Portento.

Sa kamandoan nga gipadala sa kampo Crame ngadto sa Police Regional Office7, ang mopuli kang Col. Okubo mao si Sr. Supt. Manuel Abrugena samtang sa Negros Oriental mao si Sr. Supt. Raul Tacaca nga pulos matod pa gradwado sa Philippine National Police Academy (PNPA) Class of 1995.

Matod ni Chief Supt. Robert Quenery, Director sa PRO7, nga ang pag-relibo sa mga opisyal sa kapulisan lukop nasud maoy desisyon sa PNP oversight committee nga posibling adunay nakitang problema ilabi na sa ilang performance.

Sugod usab kagahapong adlawa gipa report na si Col. Okubo sa Police Holding Accounting Unit sa PRO-7 samtang si Col. Portento gibalhin sa kampo Crame nga wala pa mahibaw-i unsay posisyon niini.

Wala na mohimo pa og pormal nga turn-over of command ang mohulip sa mabakante nga pwesto sa maong mga police opisyal dungan sa mando sa ilang labaw nga si PNP Chief Oscar Albayalde nga sigurohon ang siguridad atol sa piniliay.

Giklaro hinuon ni General Quenery nga ang kalit nga lahugay nga gihimo sa kampo Crame dili makaapekto sa pagpangandam sa siguridad sa eleksiyon.