Aroganting konduktor nag-overcharge

Angay susihon sa nahitungdang ahensiya ilabi na sa Land Transportation Franchising and Regulatory Board (LTFRB) kining over-charging sa mga mini bus diha sa South Bus Terminal magabii. Niadtong Lunes sa gabii, usa ka konduktor sa JRK (body no. SP20) ug may plate no. 1342 ang naniket sa iyang mga pasahero nga taas ug wa masubay sa taripa nga gilagda sa LTFRB.

Daghang nireklamo ug nagbagotbot nga mga pasahero tungod kay gawas sa taas nga plete arogante ug isog ang konduktor. Imbes P20, gikan sa terminal ngadto sa Minglanilla, iyang gikuridas apil ang dug-ol nga pasahero og tag P30.

Kon dunay moreklamo iyang singhagan ug ingnon nga gisabot na kuno daan didto sa terminal ang maong pletihan.

Duha ka pasahero, usa niini edad-edaran na, ug ang usa estudiyante ang napugos sa pagkanaog sa dihang ilang nasayran ang taas nga pletihan.

Dunay pasahero nga maayo na untang pagkalingkod, apan iyang gipapulihan kay lagi kuwang kuno ang giplete niini.

Sa dihang gisukmatan sa usa ka pasahero nga wa sa taripa ang iyang pagpangolekta, mipadayag kini nga andam siyang moatubang kon unsay ilang reklamo.

Iyang hudlat-hudlaton ang mga pasahero nga kon dili mobayad sa sakto, iyang pabalikon ang bus sa terminal.

Ang nakapeligruso kay namahad og pasahero nga iyang gikalalis. “Bantay ka lang inig naog nimo,” iyang gipadungog.

Namatikdan nga nagpadungogdungog nga aduna siyay kuhaon sa iyang bag. Nadunggan usab nga daw sa nagpalaban kini sa iyang washing / helper. Kakuyaw ning konduktora.

Hinaot nga maimbestigahan kini sa LTFRB.