Vision of love
Human ko manihapon sa suki kong karenderya nga nahimutang sa atbang sa boarding house nga akong gipuy-an, misulod na ko sa akong kuwarto. Duha ra mi ang nag-okupar sa maong kuwarto pero double deck ang among hidaanan. Wa pa si En-en. Daan na tong nag-ingon nako ganinang buntag nga madugay siya sa pagpauli kay manuroy sila ug ang iyang boyfriend.
Nagbasa-basa kog pocketbook nga detective story. Paborito nako ang maong tema. Unya may nanuktok sa pultahan sa kuwarto. Naabli kini ug miguho ang ulo sa kauban kong boarder nga babaye sab.
“Naa kay bisita, Lyza. Tua siya sa sala, naghuwat nimo.”
Unya mibiya na ang kauban kong boarder. Naghunahuna ko. Kinsa kaha akong bisita? Wa nuon ko makapangutana kon lalaki o babaye ba kini. Di man gud estrikta ang biyuda namong landlady. Padawaton ming mga boarders og bisitang lalaki bisag gabii apan kutob lang sa alas diyes. Gitan-aw ko ang akong wrist watch, eight pa lang.
Mibangon ko. Midiretso kog gawas sa kuwarto. Pag-abot ko sa sala, nakahunong kog lakaw. Si Nikko ang lalaki nga akong nakita. Mapahiyumon siyang nagtan-aw nako. Miduol ko niya ug milingkod ko sa iyang atbang.
“Milagro man nga nasuroy ka dinhi? Bitaw, Nikko, wa kaha ka masaag?”
Mipahiyom ko. Friend gihapon mi si Nikko. No hurt feelings ang among panagbuwag.
“Wa ko masaag, Lyza. Ikaw gyud ang akong tuyo.”
“Wow! Ako gyud? Abir, ngano man kuno, bi?”
Wa ko seryusoha ang giingon ni Nikko. Gipaagi ko lang sa kumedya ang akong pagtratar niya.
“Kining kuan man gud, Lyza, ning pila ka adlaw nga nangagi, kanunay man tikang mahunahuna.”
Mikatawa kog kusog. Apan nagpabiling seryuso si Niiko. Gitan-aw ko siyag dugay. Morag nagmatinud-anon siya sa iyang gisulti.
“C’mon, Nikko. Wa na ta, uy. Aside from that, duna ka nay uyab.”
“Wa na mi, Lyza. Kanunay siyang masuko nako. Kanunay siyang magselos nimo. Kuan man gud, di gyud ko makalikay sa paghisgot nimo kon magkauban mi. Daygon tika sa iyang atubangan. Maong may pag magbuwag mi kay wa man mi kalinaw. Gawas pa sab, di man true love ang gibati ko niya.”
Miseryuso ko. Dugay ming nagkatinan-away si Nikko. Gusto ba kaha ni Nikko nga magkabalik mi? Nahunahuna ko kini.
(SUMPAYAN)