Binilanggo nga bayani
Napulo na ka tuig nga nagtingkagol sa prisuhan sa BBRC si Timmy Gomez. Kanhi usa siya ka pulis sa probinsiya sa Sugbo. Wala niya damha nga mahitabo ang usa ka dautang hitabo sa tibuok niyang kinabuhi nga lab-as pa sa iyang panumdoman. Ang trahedya nga maoy hinungdan sa iyang pagkabilanggo.
Malipayon silang nangaligo sa maanindot nga baybayon sa Isla Gibitngil. Siya ug ang iyang hinigugma nga si Carmen. Nagkasabot na sila nga magpakasal inig-abot sa bulan sa Oktubre atol sa adlaw nga natawhan ni Timmy.
“Karong gabii, Day, gikan sa simbahan magpakuyog ko ni Padre Manuel aron mananghid kang Mama Lita nimo ug masabutan na ang atong kasal,” matod ni Timmy. Nagsandig sa iyang dughan si Carmen samtang namahulay sila nga nagyaka daplin sa baybayon.
“Ayaw lang, Dong, ayaw lang si Padre Manuel. Mas maayo pa si Pastor Rusty na lang kay suod baya kaayo na sila si Mama,” sugyot ni Carmen.
“Sige, si Pastor Rusty na lang. Inig pamauli nato unyang hapon, atong agion, Day,” ni Timmy. Mitindog si Carmen aron mopadayon pagkaligo sa dagat.
“Adto ta sa dagat, Dong. Gukda ko. Lumba ta’g langoy. Dali na!” nagkatawa nga miagda si Carmen dayon og dagan. Mogukod na unta si Timmy dihang mitingog ang iyang selpon.
“Pards, dali dayon diri sa imong balay. Dia mi diri kauban si Hepe ug si Mayor Roque!” matod ni Nestor, kauban niyang pulis nga nanawag.
“Ha? Ngano man? Unsay tuyo nila? Off duty baya ko karon, pards!”
“A, basta dali dayon kay naay dautang nahitabo, pards! Dalia please! Emergency lang!” tubag ni Nestor.
Mao ra kini ang iyang nahinumdoman kay sa pagpamauli nilang Carmen gisugat dayon siya sa ilang Hepe ug gi-pusasan.
“Sorry kaayo, Gomez, may nakuha nga tulo ka kilong shabu sa imong bag. Saksi si Mayor Roque sa pag-abli ini,” matod ni Hepe Veloso.
Wala dayon makatingog si Timmy kay nakita niya ang Mayor nga nangyamiid ang dagway ug mingisi. Dugay nang nagbirig-birig ang Mayor kang Carmen ug nagbahad pa kini nga angkunon niya si Carmen, by hook or by crook.
Milanat ang kaso og unom ka bulan. Na-sentensiyahan si Timmy og napulo ka tuig.
USA ka buntag gipatawag si Timmy sa ‘jail warden.’ Daw dili siya makatuo sa iyang nakita. Si Carmen, ang iyang hinigugma, ug ang inahan niini malipayon nga mihangop kaniya.
“Dong, makagawas ka na. Madayon na gyud ang atong kasal. Wala diay kay sala. Ania si Hepe nga maoy nahimong state witness. Wala na si Mayor Roque kay napatay sa ‘shootout’ batok sa taga PDEA. Drug lord diay siya ug siya ang nag-set up sa tanan aron ka mapriso,” mahinangpon nga mibalita si Carmen.
“Diyos ko! Salamat kaayo, Lord!” tuaw ni Timmy.
“Gomez, malaya ka na! You are now a free man and a hero. Ikaw napili nga usa sa ‘ten outstanding policemen’ karon tuiga. Here are your release papers. Congratulations!” matod sa warden nga milamano kang Timmy. Milamano sab ang Hepe kaniya. “Sir, daghang salamat!” ni Timmy ngadto warden ug sa ilang Hepe. “Imbitado mo sa among kasal ni Carmen.” Miduol siya sa altar ni Senyor Sto. Nino nga diha sa opisina sa warden. Midaligdig ang mga luha sa kalipay sa mga aping sa usa ka binilanggo nga bayani.
(KATAPUSAN)