BASKETBALL DILI BOKSING- FLOYD
Pareho untang interesado sila si Floyd Mayweather Jr. ug Manny Pacquiao nga personal silang magkatagbo og balik atol sa pagbisita ni Mayweather sa Pilipinas apan basi sa ilang tagasatagsa ka eskedyul, kuli kining mahitabo.
Si Mayweather, kinsa naabot sa nasod niadtong Martes sa kadlawon, adunay grabe ka hugot nga eskedyul sa iyang pagbisita sa nasod samtang si Pacquiao kasamtangang nag-ensayo sa General Santos City alang sa sunod niyang away.
“Hopefully, we can sit down and meet, probably have lunch or dinner and just see how’s everything been going for Manny and his team,” matod ni Mayweather sa interbyu sa ABS-CBN News.
Si Mayweather kasamtangang nagpaharuhay sa iyang pagbakasyon sa El Nido, usa ka luhong resort sa Palawan.
Nagkanayon si Pacquiao nga dili na siya bastabasta makabiya sa iyang training apan kon makadalikyat si Mayweather pagbisita sa General Santos, andam siyang moabi-abi niini.
“Kung makipag meet sa kanya (Pacquiao), okay lang naman. Ongoing na kasi yung training camp dito,” pasabot ni Aquiles Zonio, media liason sa Pambansang Kamao sa Pilipinas.
Gipasabot ni Zonio nga nasayod nang daan si Pacquiao nga magbakasyon si Mayweather sa nasod.
“Siya pa nga ang nagsabi sa amin,” matod ni Zonio.
Sa usa ka makasaysayong away nga mibuak og mga rekord, si Pacquiao (59-7-2, 38 KOs) nasugamak sa kontrobersyal nga unanimous decision nga kapildihan batok kang Mayweather (50-0, 27 KOs) niadtong 2015.
Gipadayag ni Mayweather nga kon itugot sa kahigayunan nga magkakita sila og balik, gusto siyang makigduwa og basketball ni Pacquiao, kinsa naila sab sa iyang pagkamahiligon ning maong natad sa paugnat sa kusog.
“Absolutely,” daling tubag ni Mayweather dihang gipangutana kon gusto ba siyang makigduwa og basketball sa Pambansang Kamao sa Pilipinas.
Asoy ni Mayweather, kinsa kanunay magtan-awan og mga duwa sa National Basketball Association (NBA), nga dili siya hanas sa basketball apan makamao sab siyang moduwa niini.
“I could play basketball a little bit,” matod ni Mayweather. “I’m not a professional, but I can hold my own.”/ESL