Naka-adjust na'g sugod si Sultan sa klima sa U.S.

Hinayhinay nang naka-adjust si ALA fighter Jonas Sultan sa klima sa California, USA, pipila ka mga semana sa dili pa ang gikaintapan niyang pag—challenge sa kababayang si International Boxing Federation (IBF) super flyweight king Jerwin Ancajas.

Mao kini ang labing unang pagtaak ni Sultan sa Amerika hinungdan nga sayo kining migikan paingon ning maong nasod alang sa pagpadayon sa iyang training.

Ang makasaysayong panagharong nila ni Sultan ug Ancajas gikatakda karong Mayo 26 sa Selland Arena sa Fresno.

Gipasabot ni ALA gym head trainer ni Edito Villamor nga dili pa normal ang pagkatulog ni Sultan gumikan sa lahi nga oras apan giklaro niya nga naka-adjust na kini'g sugod.

Apan bisan pa niini, nagsugod na si Sultan sa iyang training sa Wild Card gym sa Los Angeles nga gipanag-iya sa bantugang American trainer nga si Freddie Roach.

Nagkanayon si Villamor naka-sparring na si Sultan batok sa usa ka amateur champion.

Kauban ni Sultan nga nagtraining sa Wild Card Gym ang iyang stablemate nga si world champion Donnie "Ahas" Nietes, kinsa aduna sa'y dakong tahas sa umaabot.

Hinuon giklaro ni Villamor nga ning puntoha, ang ilang gituotkan og maayo mao ang misyon ni Sultan gumikan kay sayod silang dili kini sayon.

Wala pa masayri kon kanus-a ang sunod nga away ni Nietes apan nangandam na lang kining daan.

Sa iyang bahin, si Sultan usa ka dakong underdog sa iyang pagpakigbatok kang Ancajas.

Si Sultan naghupot og 14-3, 9 KOs nga rekor samtang si Ancajas adunay impresibong 29-1-1, 20KOs nga baraha.