Parks wa pa makadesisyon
Usa ka semana human niya natabangan ang San Miguel Alab Pilipinas nga maangkon ang korona sa Asean Basketball League (ABL), si Ray Parks wala pa’y desisyon kon unsa’y lakang ang sunod niyang pagabuhaton.
Misamot ang panawagan nga mosulod na siya sa Philippine Basketball Association (PBA) human naangkon ni Parks ang Finals MVP award sa ABL.
Sa ABL finals series, diin gilupig sa Alab Pilipinas ang Mono Vampire sa Thailand sa deciding Game 5, si Parks nag-average og 23 puntos.
“I’m just trying to continue to cherish this moment of winning a championship,” matod ni Parks sa interbyu sa ABS-CBN News.
Gipasabot ni Parks nga kasamtangan siyang nagpahuway gumikan kay grabe ang iyang kahago sa ABL diin wala'y hunong ang ilang pagbiyahe og lagyo alang sa ilang mga duwa gikan pa niadtong Nobiyembre sa miaging tuig.
“It was a long season, a tough one,” batbat ni Parks, kinsa anak ni kanhi 7-time Best Import awardee sa PBA nga si Bobby Parks.
Gipasabot ni Parks nga sa dili pa siya mobuhi og desisyon, mokonsulta una siya sa iyang coach sa Alab Pilipinas nga si Jimmy Alapag. “Within the next couple of weeks, I’ll continue talking to Coach Jimmy (Alapag) as my mentor, Coach Danny Seigle and Boss Charlie (Dy), and Sir Hans Sy, about what are the next steps, and what are the plans for the future,” batbat ni Parks.
Sa bag-o lang nahuman nga season sa ABL,si Parks nag-average og 16.72 puntos, 5.17 rebounds, ug 3.48 assists.