GSW, ROCKETS MING-ABANTE
Nadayon ang gilauman sa kadaghanan nga mag-abot sa Western Conference finals ang defending champions Golden State Warriors ug Houston Rockets sa National Basketball Association (NBA) 2018 Playoffs.
Kini human parehong gipangdispatsar sa duha ka mga kampo ang ilang tagsatagsa ka kontra sa Game 5 nga naghuman og sayo sa managlahi nilang conference semi-finals
series, 4-1. Atubangan sa ilang mga dumadapig, ang Warriors ningmakmak sa New Orleans Pelicans, 113-104, samtang gipanglampornas sab sa Rockets ang Utah Jazz, 112-102.
Sa ikaupat niyang duwa sukad sa iyang pagbalik gikan sa pagkaangol, si Stephen Curry tatawng nabalikan sa iyang saktong kondisyon ug nagpakatap na sab kini’g puntos sa bisan asang puwesto sa korte.
Gipangulohan sa kanhi twotime MVP ang Warriors pinaagi sa iyang 28 puntos, nidugang og 24 puntos si Kevin Durant, niamot og 23 puntos si Kaly Thompson samtang nihatag og 19 puntos si Draymond Green.
“I think Coach did a great job though of just giving him a little bit here and there and tonight really just letting him go,” matod ni Durant kabahin kang Curry.
“You see when you let the dog off the leash what happens.”
Ning maong kadaugan, nakatabla ang Warriors sa rekord nga 15 ka sunodsunod nga kadaugan sa home playoff nga mga kombati nga unang narehistro sa Chicago Bulls niadtong Abril 27, 1990 hangtod sa Mayo 21, 1991.
Ang Pelicans gipangulohan ni Anthony Davis pinaagi sa iyang 34 puntos ug 19 rebounds samtang niamot og 27 puntos si Jrue Holiday.
Gikan sa 26 puntos nga pagkalubong, ang Pelicans inanayng ningkamang hangtod nga ilang napahak ang labaw sa Warriors ngadto sa pito na lang ka mga puntos, 100-107, sa nahabiling 2:04 minutos.
Gipahugtan sa Warriors ang ilang depensa aron protektahan ang ilang labaw hangtod na sa katapusang gutlo.
“I feel confident in what I’m able to do out there,” matod ni Curry. “Timing could still get a little bit better with the ball and things like that when you start to get so excited, still when I’m out there missing six weeks is still appreciative of being out there playing.” Sa Houston, nagpakatap og
playoff career-high nga 41 puntos si Chris Paul aron pangulohan ang pag-abante sa Rockets.
“For us it was just ... they were in the way. So we were just trying to get another win,” matod ni Paul, kinsa karon pa nakasulod sa conference finals gikan sa iyang pagsulod sa NBA.
Si P.J. Tucker nidugang og 19 puntos alang sa Rockets samtang si Harden, kinsa gituohang maoy mahimong MVP ning maong season, niamot og 18 puntos.
Ang Jazz gipangulohan sa ilang pambatong rookie nga si Donovan Mitchell pinaagi sa iyang 24 puntos.