8 KA TAWO NAKUHAAN OG ARMAS
6 SAKOP OG ‘TRIBU’; LAING 2 NASIKOP ATOL SA ELEKSYON
Walo ka mga tawo ang nakuhaan og mga armas taliwa sa pagpahigayon sa dungan nga Barangay ug Sangguniang Kabataan elections.
Hinuon, sa walo, ang unom nasuta sa imbestigasyon sa kapulisan nga way kalambigitan eleksyon human sila makuhai og mga armas niadtong Dominggo sa gabii.
Ang unom nagpaila nga mga sakop sa Alimaong Tribal Group, kinsa gibalhug sa Lapu-Lapu City Police Office holding cell.
Ang maong armadong mga lalaki ningtambong og bunyag sa Sityo Paradise, Barangay Pajo niadtong Dominggo sa gabii, diin sa maong dapit adunay ilang simbahan diin gihimo ang okasyon.
Butyag pa ni Sr. Inspector Joey Bicoy, hepe sa Police Station 3, nga nakadawat sila og tawag gikan sa usa ka concerned citizen kalabot sa armadong mga tawo sa maong lugar.
Ang mga dinakpan nailhan nga sila si Terisito Canoy Causapin, alyas Kalipataw Mampatucod, 28, married, construction
worker; Roldan Dungog Paquibot, alyas Balote, 38, construction worker; Brec Jay Omolon alyas Banog, 24, way trabaho; Edmar Dionson Gomez, alyas Kali Magkono, 28, security guard nga pulos taga-Barangay Basak.
Laing nadakpan naglakip nila ni Eugene Canete Almeda, 62, taga Barangay Marigondon ug Leoric Vaflor Tampus, 29, taga-Barangay Looc, pulos mga way trabaho.
Ang mga nasikop nakalapas sa “Comprehensive Firearms and Ammunition Regulation Act” ug sa gipatuman nga Comelec Gun Ban.
Mga ebidensiya nga nahipos naglakip sa upat ka nagkadaiyang mga klase sa hinagiban, usa ka .45 kalibre nga armas nga adunay duha ka magazine ug 11 ka mga bala, 9mm pistol nga adunay magazine.
Dugang pa ni Bicoy nga ang maong mga dinakpan nangtarungan nga aduna silay katungod nga magdala-dala sa maong mga armas base sa ilang tinuohan ug ilang gisanglitanan si Datu Lapu-Lapu nga magtakin kanunay og hinagiban.
Vote buying?
Samtang sa lungsod sa Bantayan, mag-atubang og mga kaso ang pito ka mga lalake nga nasakpan sa kapulisan nga nang-apud-apod og mga sobre nga may sulod nga kwarta ngadto sa mga botante sa islang barangay sa Botigues, lungsod sa Bantayan, isla sa Bantayan, pasado alas 10 sa gabii niadtong Dominggo.
Si P/Chief Insp. Florendo Laude Fajardo, hepe sa Bantayan Police Station, nibutyag kasong kalapasan sa Batas Pambansa Blg. 881 kun Omnibus Election Code of the Philippines ug kalapasan sa Republic Act 10591 in relation sa Comelec Gun Ban ang ipasaka batok nila ni Junrey Daruca, 31; Andrew Cesa, 21; Roger Cañete, 24; Ronel Ejorango, 37; Jomer Ejorango, 31; Jessril Ejorango, 29; ug Norgeil Guzat, 21.
Sila pulos mga molupyo sa Barangay Botigues, 45 minutos ang biyahe gikan sa main island sa Bantayan.
Si Fajardo niasoy nga nakadawat sila og impormasyon nga dunay pito ka mga lalake ang naglibot-libot ug may dala nga mga sobre nga may sud nga mga kwarta alang sa mga botante sa maong barangay.
Dihang ilang gisusi ang dapit, naaktohan ang mga dinakpan nga giingong nang-apud-apod sa ilang dalang mga sobre.
Nakuha sa mga pulis gikan sa mga dinakpan ang 19 ka mga sobre nga may sulod nga P50 matag usa nga ang kinatibuk-ang kantidad kay moabot og P950 ug gisudlan usab og mga sample ballot nga may nakasuwat nga mga pangan nga nagpapili sa Barangay Botigues.
Si Fajardo nidugang nga nakuhaan usab si Andrew og pistola ug walo ka mga bala alang sa shotgun.
Si Cebu Provincial Election Supervisor Lionel Marco Castillano namahayag nga sa kinatibuk-an, malinawon nga napahigayon ang barangay ug Sangguniang Kabataan elections.
Sumala niini nga gawas sa wala makit-i dayon ang pangan sa mga botante, way dagkong mga panghitabo ang natala sa ilang buhatan.
NUP nasikop
Sa Mandaue City, usa ka non-uniformed police (NUP) personnel ang nasikop human nakuhaan og kalibre .45 nga armas sa Don Gerardo Ouano Avenue Brgy. Opao, dakbayan sa Mandaue kagahapon sa hapon.
Ang suspetsado giila nga si Kim Herodias, 34, ulitawo, taga Zone Ubi, Barangay Paknaan, Dakbayan sa Mandaue.
Matod ni Chief Inspector Mercy Villaro nga si Herodias nasikop atol sa paghimo og inspeksyon ni PSSupt. Renato Dugan gikan sa Police Regional Office (PRO) 7 inubanan sa mga kawani sa Station 5 sa Don Gerardo Ouano National High School sa maong barangay mga alas 2:30 sa hapon.