Sandbar, mga dive site sa Sumilon sirhan og balik
Sirad-an na usab sa kagamhanan sa lungsod sa Oslob ang sandbars ug dive sites sa Sumilon Island ugma, Mayo 16.
Si Oslob Mayor Jose Tumulak Jr., namahayag nga ipadayon nila ang ilang nasabutan nga sa matag ikatulong Miyerkules sa buwan sirad-an ang sandbars ug diving sites sa isla sa Sumilon aron malimpyohan ang dapit ug makaginhawa usab ang kinaiyahan gikan sa mga turista nga mobisita sa lugar.
Ang mayor niangkon nga maglisod sila sa higpit nga pagpatuman nga limitahan hangtod sa 500 lang ka mga turista ang dapit kay lainlain kini og gigikanan.
Siya niingon nga gihangyo niya ang mga boat operator nga kon daghan na ang mga bisita sa sandbars ug diving sites, adto una nila kini dad-on sa pikas lugar diin nakigsabot na sila sa tag-iya.
“Ato usa na reviewhon kon unsay kaya i-implement. Maglisod ta og patuman unya dili implementable sa kadaghanan,” sumala ni Tumulak dihang nahinabi sa Superbalita Cebu kagahapon.
Moabot sa tulo ka tonelada sa lainlaing mga klase sa basura ang nahipos dihang gitak-upan sud sa usa ka semana ang sandbars ug diving sites sa miaging buwan.
Si Tumulak nagkanayon nga magsabot usab sila mga opisyal sa lungsod ug ubang stakeholders kon unsang adlawa himuon ang regular nga pagpanglimpyo sa Tumalog Falls ug ang temporaryo nga pagpasira niini sud sa usa ka adlaw.
Samtang magtukod og monitoring team ang Oslob government aron maoy mosusi ug molihok niadtong 47 ka mga establisemento nga nilapas og tukod sa ilang mga estruktura sa baybayon sud sa 20-meter easement zone.
Ang monitoring team langkuban sa mga sakop sa Department of Environment and Natural Resources, Office of the Mayor, Municipal Engineering Office ug ubang ahensiya ug grupo nga nalambigit sa pagpanalipod sa kinaiyahan.
Sigon sa mayor mangayo sila og listahan sa DENR sa maong mga establisemento aron ilang ipatawag sa tigom ug hangyuon nga boluntaryo nga moguba sa ilang illegal structures.
“Ug dili ta mag voluntary og guba sa illegal structures basin ang national government na ang molihok, mapareha na unya ta sa Boracay nga gisirad-an og unom ka buwan,” dugang ni Tumulak.