3 ka PUJs nanghakot og botante, gidakop

Tulo ka mga public utility jeepney (PUJ) sa siyudad sa Sugbo ang nadakpan sa mga sakop sa Land Transportation Franchising and Regulatory Board (LTFRB) sa Central Visayas kagahapon nga nanghakot og mga botante ug nilabyog gawas sa ilang naandan nga mga rota nga way mga special permit.

Si LTFRB 7 Director Ahmed Cuizon nibutyag nga hugot gimando sa ilang labaw nga gidili ang paggamit sa mga publikong mga sakyanan sa paghakot sa mga botante pabor sa pipila ka kandidato.

Sa memorandum ni Transportation Assistant Secretary for Special Concerns Eymard Eje, ang Department of Transportation ug mga ahensiya nga sakop niini, gitahasan sa pagpahamtang og multa ug pagpasaka og mga kaso batok sa mga nakalapas sa lagda.

Ang unang PUJ, 15 (GWE 427), ug may rota nga Oprra-Colon ang naaktohan nga nagpasakay og mga botante sa Cebu Normal University sa Osmeña Blvd.

Matod ni Cuizon, dili mailhan nga nilapas sa iyang rota ang maong PUJ apan gumikan sa gibutang sa atubangan niini, Capitol Site Ponce 3, nabantayan sa iyang mga sakop nga nanghakot kini og mga botante gawas sa Cebu Normal University (CNU).

Ang ikaduhang PUJ, 01B (275 CEO), may rota nga Urgello -Colon, ang naaktohan usab nanghakot og mga botante gawas sa City Central School diin sa passenger’s side niini sa atubangan, makita nga dunay nakabutang nga logo sa pulitiko sa Barangay Sambag I, siyudad sa Sugbo.

Aang ikatulong PUJ, 01K, (0901-117457) ug may rota nga Urgello-Colon ang nasakpan nagpasakay og mga pasahero sa Osmeña Blvd.

Si Cuizon nibutyag nga giisyuhan na nila og Inspection Report Summons (IRS) ang mga drayber sa PUJ ug gipatawag ang ilang mga operator aron madungog ang ilang habig ug madesisyonan kon pila ang ipamulta nila.

Moduso usab sila og report sa Commission on Elections bahin sa mga kandidato nga nipakyaw sa maong mga PUJ alang sa tukma nga aksyon nga himuon.