PAPA SA NAGPASUBLI PAGPAPILI, GIPUSIL

Amahan sa nagpapili og balik isip barangay kagawad sa Poblacion, LapuLapu City gibanhigan pipila ka oras sa wa pa kasugdi ang botasyon kagahapon.

Giila ang biktima nga si Eduardo Godornes, 69, amahan ni James Amistad Godornes, nagpa-reelect nga kagawad sa Poblacion.

Asoy ni PSInsp. Joey Bicoy, hepe sa Police Station 3 nga ang biktima mi-park sa iyang Toyota Fortuner sa atubangan sa iyang balay sa dalan Lopez Jaena nga giingong gikan sa casino kagahapon sa 2:30 sa kadlawon.

Atol sa pagkanaog sa biktima usa ka wa mailhing lalake ingon sa nagpaabot ang mibunot sa giluklok nga armas diha sa iyang hawak dayong pusil sa biktima.

Nagsilbing taming ni Godornes ang pultahan sa iyang sakyanan sa dihang na-atol ang pagpamusil dayon niyang abli niini.

Matod pa ni Bicoy nga riding-in-tandem ang maong mamumuno sa dihang dali nga niangkas ngadto sa nagpaabot nga motorsiklo base sa saysay sa nakasaksi.

Atol niining pagsuwat gitabang sa mananambal sa pribadong tambalanan sa dakbayan sa Sugbo si Godornes nga naka-angkon og samad pinusilan sa iyang wala nga bahin sa abaga, tiyan, wala nga paa ug bagtak.

Ang opisyal nagtuo nga way bolok politika ang maong pagpamusil ug gitan-aw sa kapulisan ang negosyo o personal nga posibleng motibo.

Matod pa ni Bicoy nga kaniadto mahiligon manari ang biktima ug dili nila makonpirmar ang gikatahong nahimo sab nga financier sa masiao si Godornes.

Nanag-iya og kan-anan ang biktima.

Ang kapulisan nakahipos og tulo ka basiyo nga bala ug duha ka slug sa .45 calibre.

Samtang, nalungag ang windshield sa driver side sa maong sakyanan diin ang igo niini nilahos sa tapaludo sa luyo nga ligid.

Padayon pa nga gi-ila sa Police Station 3 ang mamumuno nga gihulagway nga nagsul-ob og itom nga jacket ingon man ang pag-request nga makakuha og kopya sa CCTV footage duol sa crime scene.