Ibalik ang kabubut-on
Dinhi sa Sugbo, way mga dagkong kasikas nga nahitabo kagahapon atol sa adlaw sa Barangay ug Sangguniang Kabataan (SK) elections bisan pa man tuod ug sama sa ubang dapit, wa kalikayi ang dayag nga pinalitay sa botos. Duna man tuoy strafing o pagpaarakan didto sa usa ka barangay sa Dumanjug apan kaluoy sa Diyos way nanga-igo. May napusilan sa dakbayan sa Lapu-Lapu nga giiingong amahan og kandidato apan di pa usab matino kon kini may kalabutan ba sa piniliay.
Kagabii, aduna nay pipila ka mga mananaog nga mga piniling barangay ug SK officials nga gipangproklamar apan di usab nato kalikayan nga adunay mga na-pending nga proklamasyon tungod sa mga ginagmayng kakulian.
Molanat pa man tuod og pipila ka mga adlaw ang mga hisgut-hisgot nga may labot ang pinili-ay, apan atong panghinauton nga ang mga kaligotgot nga bunga sa sinukliay sa mahait nga pulong tali sa mga matag habig atol sa kampanya, hinayhinay na unta kining molurang na.
Sa laktod nga pagkasulti, uli-on na nato ang maayong kabubut-on sa matag usa, ug pilit natong hangupon ug dawaton ang mandato sa katawhan nga maoy gituohan nga makahatag og igong kaayohan.
Ngadto sa mga bulahan ug mga mananaog nga mga kandidato, hangupa ang mga nagpaabot nga responsabilidad nga gisangon diha kaninyo ug hatagi ang katawhan sa inyong makatagbaw nga serbisyo nga walay gipili.
Sa mga wala mapalari, sayod kita nga sama sa mga mananaog, ang pagserbisyo sa katawhan mao usab ang inyong katuyoan, apan wa kini magpasabot nga sa inyong pagkapukan nahanaw na usab ang tanan ninyong panglantaw.
Hinuno-a nga taliwala niining tanan, inyong ipakita sa kadaghanan nga sa gihapon kamo andam moayuda kay ang kalambuan sa barangay maoy tinud-anay nga mananaog sa piniliay.