Unsay sunod nga mahitabo?

Timing. Maayo kaayo ang timing sa pagpalagpot ni kanhi Chief Justice Maria Lourdes Sereno sa Korte Suprema pinaagi sa quo warranto petisyon nga gipasaka ni Solicitor General Jose Calida kay giatol gyud sa nagsingabot nga piliay sa barangay ug Sanggunian Kabataan (SK) samtang ang atensyon sa kadaghanan didto sa pangampanya sa mga kandidato.

Niadtong Biyernes gipakanaog ang desisyon sa Korte Suprema sa boto nga 8-6. Walo ka husgado mibotar sa pagpalagpot ni Sereno samtang ang unom mibotar nga di matangtang sa pwesto si Sereno pinaagi sa quo warranto kon di sa impeachment lamang.

Ang walo ka justices bisan sa wala pa ang quo warranto klaro na kon asa ang ilang hilig kay mitestigos man gani ang lima didto sa kongreso atol sa hearing sa impeachment.

Kon dunay usa ka tawo nga angayan mangigi o magdumot ni Sereno mao si Senior Associate Justice Antonio Carpio tungod kay sa pagtudlo ni Sereno siya ang pinaka senior. Apan daghan ang mitahod ug mibilib ni Carpio tungod kay usa siya sa unom ka justices nga miboto nga i-dismiss ang quo warranto petisyon.

Ang pagtangtang kang Sereno pinaagi sa quo warranto nahimo nga pagya karon. Akong mga amigo nga dili mga abogado niadtong Sabado gihimo nga komedya ang panghadlok sa pag-ingon nga i-quo warranto tika.

Ang nahitabo ron sa atong hudikatora nga ang mga husgado sa Korte Suprema nga mapalagpot ra diay sa quo warranto nga unta basi sa atong Batakang Balaod matangtang ra sila sa ilang pwesto pinaagi sa impeachment nakahatag kabalaka sa katawhan.

Ang dakong pangutana sa mosunod nga katuigan kon unsay mahitabo sa atong Korte Suprema kon ang atong mga husgado labina kon dili sila magkasinabot tungod kay nagselos o nagkabangi sayon na lang tangtangon sa pwesto pinaagi sa quo warranto? Morag way pulos ang atong Batakang Balaod karon. Dinhi atong makita kon unsa ka poderoso ang atong Presidente Duterte kay og unsay imando matuman man gyud. Kahinumdum mo dihang nasuko siya ni Sereno kay gidudahan siya ang nagpaluyo sa quo warranto ug iyang gimandoan si Calida nga ayohon iyang petisyon? Pero ang mandasyon ni Presidente misangko pud sa walo ka husgado.

Wa jud masayop ang Time Magazine sa paglakip ni Presidente Duterte nga usa siya sa mga “strongmen” nga lider sa nasud kay nakita ni ron sa nahitabo ni Sereno. Ngano bitaw nga gihagit ni Sereno si Presidente Duterte, tan-awa di natangtang ka.

Daghan ang nagtuo nga kuwang ang ebidensya batok ni Sereno sa impeachment mao nga gipasakaan siya og quo warranto diha mismo sa Korte Suprema tungod kay dunay lima ka justices nga wa ka makauyon ni Sereno. Nahitabo ang gipangagpas sa mga kaalyado sa Presidente.